1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Për herë të parë Kabuli bëhet vendtakimi i politikanëve

Të martën zhvillohet në Kabul konferenca ndërkombëtare për Afganistanin, ku do të diskutohen përparimet dhe disfatat në arritjen e paqes dhe rindërtimin e Afganistanit. Konferenca e fundit u zhvillua në Londër në janar.

default

Ushtarë gjermanë në Afganistan

Në gjysmën e parë të vitit politika e Afganistanit ishte tema më problematike e politikës së jashtme të qeverisë gjermane. Gjendja e sigurisë u përkeqësua më tej, shtatë ushtarë gjermanë humbën jetën, tashmë edhe zyrtarisht flitet për "luftë". Kancelarja gjermane siguroi në deklaratën e saj para Bundestagut se ajo "nuk zbukuron asgjë" për Afganistanin.

Merkel Afghanistan Berlin Afghanistan Soldaten

Kancelarja gjermane Merkel (CDU) duke folur për angazhimin gjerman në Afganistan (26. 01.2010) në Berlin.

"Që ushtaret dhe ushtarët tanë atë, qö përjetojnë përditë në Afganistan, e quajnë luftë civile, apo thjesht luftë, këtë unë e kuptoj shumë mirë. Kush ka përditë frikën se po bie në ndonjë grackë, apo po bëhet pre e sulmeve me armë, ai nuk mendon për nocione juridike."

Për vite me radhë qeveria gjermane ka paraqitur në opinionin publik imazhin e një misioni stabilizimi të suksesshëm. Pas konferencës së Londrës në janar 2010, ku u bënë të dukshme deficitet në këtë drejtim, vlerësimi i Merkelit u bë më realist se më parë:

"Rreth tetë vjet pas fillimit të misionit duhet të konstatojmë - këtë e them edhe me sens vetëkritik dhe pa kalim faji askund - ka pasur disa suksese, por ka pasur shumë dështime dhe qëllimet tona ka qenë pjesërisht shumë jorealiste, madje edhe të gabuara."

Dossierbild 3 Afghanistan Konferenz

Presidenti afgan, Hamid Karzai, në konferncën për Afghanistanin, 28 01.2010

I gabuar ka qenë përfytyrimi që talebanët mund të mundeshin me fuqinë ushtarake. Megjithëse në Afganistan ndodhen më shumë se kurrë më parë ushtarë të NATO-s, rajone të tëra të këtij vendi zotërohen nga talebanët.

Politikani i SPD-s në opozitë, përgjegjës për politikën e jashtme, Gernot Erler, kujton se qershori me 102 të vdekur ka qenë për NATO-n muaji me më shumë humbje që nga fillimi i misionit:

"Luftimi i kryengritjes sipas një metode të re filloi me operacionin "Mushtarak" në shkurt dhe çoi në vënien nën kontroll nga forcat e NATO-s të një rajoni të quajtur Marjah. Pas kësaj duhej të zhvillohej një ofensivë për rimarrjen e Kandaharit. Kjo është shtyrë për një kohë të pacaktuar."

Tashmë duhen provuar rrugë të tjera. Presidenti Hamid Karzai po kërkon pajtimin me talebanët dhe po kërkon heqjen e 50 emrave nga lista e terrorit të Këshillit të Sigurimit të Kombeve të Bashkuara. Bashkësia ndërkombëtare është skeptike. Përveç kësaj përmes programit të kthimit synohet që të fitohen bashkëpunëtorët e talebanëve që të dorëzojnë armët.

Afghanistan Deutschland Vier deutsche Soldaten in Afghanistan getötet

Ushtarë gjermanë në Afganistan në Kundus

Ministri i Jashtëm gjerman, Guido Westerwelle, mendon se riintegrimi i talebanëve është "i drejtë" dhe i arsyeshëm".

"Në thelb në konferencën e Londrës kemi vendosur për një program, me të cilin synohet të rikthehen në shoqëri normale luftëtarët talebanë. Këtë program do ta analizojmë në Kabul dhe do të vendosim për dhënien e fondeve, që Gjermania ka parashikuar."

Ministri i Jashtëm gjerman Westerwelle pret nga konferenca e Kabulit propozime konkrete, se si duhet të luftojë korrupsionin qeveria afgane dhe si do të përmirësohet aftësia qeverisëse. Kur do të marrë qeveria afgane përgjegjësinë për vendin e saj, kjo nuk dihet ende. Ndryshe nga vendet e tjera, qeveria gjermane nuk ka përmendur ndonjë datë për tërheqjen e 4.500 ushtarëve të Bundesverit, por përmend vetëm fillimin e tërheqjes nga Afganistani në vitin e ardhshëm.

Autor: Nina Werkhäsuer/Lindita Arapi

Redaktoi: Angjelina Verbica

  • Data 19.07.2010
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/OOhb
  • Data 19.07.2010
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/OOhb