Obama: SHBA paguan një çmim të lartë për të ardhmen e Irakut
1 Shtator 2010Në rrugët e Bagdadit dhe të qyteve të tjera të Irakut patrullojnë tani ushtarë irakianë. Irakianët janë tani vetë përgjegjës për sigurinë në vendin e tyre. Në një fjalim drejtuar kombit presidenti amerikan Obama deklaroi se misioni ushtarak në Irak përfundoi:
"Misioni luftarak në Irak përfundoi. Operacioni për paqen në Irak mori fund dhe irakianët tani e kanë vetë përgjegjësinë për sigurinë e vendit të tyre" - deklaroi Obama në Shtëpinë e Bardhë në Uashington.
SHBA paguan një çmim të lartë për të ardhmen e Irakut
Bilanci: 4400 ushtarë amerikanë të vrarë, rreth 32.000 të plagosur dhe më tepër se një miliardë dollarë shpenzime.
"SHBA paguan një çmim të lartë për t'ia dhënë në duart e veta popullit irakian të ardhmen e Irakut. Ne dërguam atje djemtë dhe vajzat tona, që bënë sakrifica të mëdha dhe kemi shpenzuar atje shuma gjigande ndërkohë që në vend buxheti është i ulët."
Sipas presidentit Obama detyra më e rëndësishme tani është rimëkëmbja e ekonomisë amerikane. Kostot e jashtëzakonshme të luftës kanë bërë që investimet në SHBA të lihen pas dore dhe borxhet të ngrihen në një nivel tepër të lartë, tha presidenti amerikan.
SHBA-ja do të vazhdojë ta ndihmojë Irakun në luftën kundër terrorizmit
Tërheqja e trupave nga Iraku krijon kapacitete të reja për sfidat kundër terrorit në Afganistan, theksoi Obama. Gjithësesi SHBA-ja do të vazhdojë ta ndihmojë Irakun në luftën kundër terrorizmit dhe ruajtjen e stabilitetit të shtetit. Kështu në Irak do të vazhdojnë të qëndrojnë rreth 50.000 ushtarë amerikanë që do të merren me shkollimin dhe trainimn e kolegëve të tyre irakianë. Sipas planit ata pritet të largohen nga Iraku vitin e ardhshëm.
Autor: Michaela Hunger / Pandeli Pani
Redaktoi: Esat Ahmeti