Kërkimi shkencor në Gjermani
2 Tetor 2012Për studjuesit dhe shkencëtarët e huaj nuk ka qenë asnjëherë e lehtë të gjenin një vend pune në fushën e kërkimeve shkencore në Gjermani. Kjo vlen si për qytetarët e BE-së ashtu edhe për ata të të ashtuquajturave vende të treta, dmth që nuk janë as në BE dhe as në zonën ekonomike evropiane. Megjithatë sot rreth tetë për qind e të gjithë personelit shkencor në universitetet gjermane janë të huaj dhe mes tyre më shumë se 2000 profesorë janë të huaj.
Më shumë studiues në Gjermani
Bazuar në informacionet e Shërbimit Gjerman për Shkëmbime me Jashtë (DAAD) numri i shkencëtarëve të huaj në universitetet gjermane është rritur në mënyrë të vazhdueshme në vitet e fundit. Nëse në vitin 2005 midis Alpeve dhe Detit të Veriut jetonin vetëm 20 mijë sudiues të huaj, katër vite më vonë ishin rreth 30 mijë. Në këtë rritje kryesisht me shkencëtarë nga vendet e treat, jo anëtare të BE-së, ka ndikuar mbi të gjitha reforma e legjislacionit të migracionit e vitit 2007.
Vende pune në fushën e kërkimit shkencor janë tashmë shumë më të lehta për t´u zënë nga shkencëtarë të huaj, që vijnë nga vende të treta. Përpara se ky ligj të reformohej, shkencëtarët duhet të kishin leje qëndrimi me të drejtë punësimi në Gjermani. Kjo duhej të verifikohej dhe lëshohej individualisht nga zyra për të huajt dhe nga zyra federale e punës. Tani shkencëatrëve të huaj u nevojitet vetëm një leje qëndrimi për qëllime kërkimi shkencor, çka është shumë më e lehtë nga ana burokratike. Kusht për të marrë këtë leje është që shkencëtari i huaj të bëjë një marrëveshje zyrtare me një institucion shkencor gjerman për aktivitetin kërkimor që ai do të kryejë në Gjermani.
Kushte të thjeshtëzuara
Me një leje qëndrimi për qëllime kërkimore-shkencore shkencëtarët lejohen të punësohen në Gjermani, dmth të fitojnë para jashtë universitetit dhe në të njëjtën kohë të japin mësim në shkollën lartë. Nga ligji i mëparshëm është hequr klauzola sipas së cilës një shkencëtar i huaj, lejohej të punësohej vetëm nëse nuk gjendej një kandidat i përshtatshëm nga Gjermania ose vendet e tjera të BE-së. Ky rregull ishte një pengesë thuajse e pakapërcyeshme për shkencëtarët nga vendet jashtë BE-së.
Për të marrë një leje qëndrimi si kërkues shkencor duhet që personi të tregojë se ka mundësi financiare për të mbuluar shpenzimet e jetesës në Gjermani. Shkencëtarët e huaj duhet që në landet e vjetra të Gjermanisë të kenë një rrogë prej më shumë se 1750 eurosh dhe në landet e reja, dmth që i takonin dikur RDGJ më shumë se rreth 1500 euro.
Mundësi të reja edhe për doktorantët
Rregullorja për kërkimin shkencor e reformuar ka vlerë edhe për doktorantët, të cilët e përgatisin disertacionin e tyre në kuadër të një veprimtarie shkencore dhe që për këtë kanë një marrëveshje pranimi nga një institucion shkencor i akredituar.
Nëse kërkuesi shkencor ka vizë sipas rregullave të BE-së për shkencën për të qëndruar në një vend tjetër anëtar të BE-së, duhet të pajiset me një vizë për qëndrim afatgjatë për të kryer pjesë të kërkimit të tij në Gjermani. Shkencëtarë nga vendet, qytetarët e të cilëve duhet të pajisen me vizë për të hyrë në Gjermani, duhet të aplikojnë për ta marrë atë në përfaqësitë diplomatike në vendin e tyre. Leja e qëndrimit lëshohet pastaj nga zyra për të huaj që është përgjegjëse për vendin, ku ndodhet institucioni shkencor përkatës.
Shkencëtarët e huaj kanë të drejtë që gjatë kohës së qëndrimit në Gjermani të marrin me vete edhe bashkëshorten ose bashëshortin dhe fëmijët (deri në moshën 16 vjeç). Edhe ata kanë të njëjtat të drejta, dmth bashkëshorti ose bashkëshortja mund të punojë vetë në Gjermani si të punësuar ose madje si sipërmarrës.