1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

"Ne jemi xhami e hapur dhe transparente" - Xhamia e shqiptarëve në Leverkuzen

Një pjesë e myslimanëve që jetojnë në Gjermani janë shqiptarë. Ata janë organizuar në rreth 40 xhami dhe bashkësi fetare. Në Leverkuzen ndodhet e vetmja xhami me minare e shqiptarëve në Gjermani dhe Evropën perëndimore.

Në Leverkuzen ndodhet e vetmja xhami me minare e shqiptarëve në Gjermani dhe Evropën perëndimore.

Në Leverkuzen ndodhet e vetmja xhami me minare e shqiptarëve në Gjermani dhe Evropën perëndimore.

Një udhëkryq në lagjen Küppersteg në Leverkuzen. Përgjatë shtëpive të banimit dhe dyqaneve që larg të bie në sy një minare e bardhë dhe anash saj mbi xhami, një kube. Amir Xheladini është imam në xhaminë Mesxhidi-Aksa. Ai vjen nga Tetova e Maqedonisë, është 41 vjeçar dhe mysafirët i pret i veshur me kostum dhe kravatë. Teologu, që ka përfunduar studimet për publistikë dhe gazetari, është që prej vitit 1996 imam në xhaminë shqiptare në Leverkuzen.

Amir Xheladini është imam në xhaminë Mesxhidi - Aksa.

Amir Xheladini është imam në xhaminë Mesxhidi - Aksa.

Xhamia është e përgatitur për vizitorë. Në paradhomë ndodhen broshura me ngjyra e libra jo vetëm në gjuhën shqipe dhe arabe por edhe në gjuhën gjermane. Ne jemi një bashkësi fetare e hapur dhe transparente, thotë imam Xheladini. Është shumë me rëndësi që një xhami të duket si një xhami dhe të mos jetë një dhomë e errët në një oborr të pasëm ku nuk dihet se çfarë ndodh pas derës, thekson ai. "Ne jemi shumë krenarë së pari që komuniteti shqiptar mysliman ka në Gjermani një xhami me kube dhe minare. Njëherazi jemi shumë krenarë që xhamia jonë është e vetmja shqiptare me kube dhe minare në tërë Evropën Perëndimore."

Bashkësia islame shqiptare, apo vakëfi, ekziston që prej mbi 20 vjetësh në Leverkuzen. Por me kalimin e kohës hapësirat nuk ishin të mjaftueshme për rreth 500 anëtarët sa numëron sot kjo xhami. Kështu që u planfikua ndërtimi i një xhamie të re. Një xhami e cila edhe duhej të dukej si xhami.

Ne jemi një bashkësi fetare e hapur dhe transparente, thotë imam Xheladini.

Ne jemi një bashkësi fetare e hapur dhe transparente, thotë imam Xheladini.

Imam Xheladini tregon se ka pasur disa kundërshtime, por lavdëron qëndrimin e autoriteteve të qytetit Leverkuzen: "Reagimet fillimisht kanë qenë kundër në aspektin e asaj që po ndërtohet një xhami me kube dhe minare. Megjithatë, organeve përkatëse për dhënien e lejes u kanë interesuar pak reagimet e qytetarëve. Ata kanë parë se çfarë thotë ligji për ndërtimet dhe se si kushtetuta e Gjermanisë e garanton lirinë e feve… Dhe meqënëse i kemi plotësuar të gjitha kushtet, më pas nuk kemi pasur ndonjë vështirësi për marrjen e lejes."

Ismail Memishi është kryetar i Kryesisë së Xhamisë.

Ismail Memishi është kryetar i Kryesisë së Xhamisë.

Në këtë mënyrë qyteti ka ndihmuar në realizimin e ndërtimit të xhamisë së re. Por edhe para mbajtjes së referendumit kundër ndërtimit të xhamive me minare në Zvicër, edhe në Gjermani janë dëgjuar zëra, të cilat i shohin xhamitë me minare si demonstrim i forcës së fesë islame. Kjo pikëmpamje kundërshohet me vendosmëri nga imami Amir Xheladini. "Minareja dhe kubeja janë një simbol i xhamisë pa të cilat xhamia nuk quhet xhami. Me minare dhe kube ajo ka formën e vërtetë të xhamisë. Sa i takon referendumit në Zvicër, do të thoja se ndalimi i ndërtimit të minareve në Zvicër është vërtetë një sulm i qartë ndaj simboleve të fesë islame dhe ky referendum është ai që do t'u ndihmojë mendimeve antiislame jo vetëm në Zvicër por në mbarë Evropën. Është vërtetë një akt intolerant."

Ismail Memishi është kryetar i Kryesisë së Xhamisë dhe përfaqëson bashkësinë e xhamisë në Këshillin për Integrim në qytetin Leverkuzen. Megjithë debatin e nxehtë për xhamitë dhe minaretë ai nuk ka frikë për bashkëjetesën paqësore të grupeve fetare në qytetin e tij dhe sqaron përse. "Ne këtu në Leverkuzen kemi të pranishme disa bashkësi fetare dhe këtu ekziston edhe një Këshill i Feve, të cilin e kemi inicuar së bashku dhe jemi edhe ne të pranishëm dhe aktiv në të. Në Këshill, e jo në rrugë diskutohen dhe zgjidhen të gjitha problemet."

Autor : Esat Ahmeti

Redaktoi : Aida Cama

  • Data 08.12.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/KxLH
  • Data 08.12.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/KxLH