1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

020611 Ägypten Mubarak Medien

3 Qershor 2011

Siç thuhet, Mubarak do të nxirret para gjyqit në gusht. Tashmë në opinionin publik po trazohen ujërat kundër tij. Njerëzit, të cilët i drejtojnë sot mediet, janë të njëjtët, që e kanë bërë këtë edhe gjatë sundimit të tij

https://p.dw.com/p/11TrF
Demonstratë në Kajro
Demonstratë në KajroFotografi: picture-alliance/dpa

Tani po gërmohet për gjithçka dhe po nxirren të palarat në shesh, po përhapet në televizion, në radio dhe në shtypin egjiptian: që vetëm në Sharm Mubaraku zotëron katër vila dhe një pallat në Detin e Kuq. Dhe që doganat egjiptiane së fundi kanë konfiskuar një paketë nga Greqia në adresë të Mubarakut, në të cilën gjendej një kutizë e argjendtë 800 gram e rëndë me vlerë mbi 1.000 dollarë. Asnjë dyshim nuk duket i tepruar, asnjë akuzë tepër e vogël.

Ish-presidenti Husni Mubarak bëhet përgjegjës për të gjitha të këqijat dhe vështirësitë
Ish-presidenti Husni Mubarak bëhet përgjegjës për të gjitha të këqijat dhe vështirësitëFotografi: picture alliance/dpa

Hosni Mubaraku, të cilin mediet shtetërore të qeverisë e kanë hyjnizuar dhe i kanë bërë temena 30 vjet me radhë, bëhet përgjegjës për të gjitha të këqijat dhe vështirësitë: korrupsion, papunësi, varfëri. Karikaturistët janë specializuar për ta paraqitur Mubarakun në veshje të burgosurish nën trekëmbësh: "Mediet po qëllojnë tani pa pushim mbi Mubarakun, ato trazojnë ujërat kundër tij, nxisin hidhërimin dhe ndjenjat e hakmarrjes. Mediet egjiptiane sot drejtohen nga të njëjtët njerëz si në kohën e Mubarakut. Të njëjtët njerëz, që ishin më parë oborrtarët e tij, shfaqen tani si akuzues. Dhe besojnë se kështu mund të vërtetojnë, që tani janë revolucionarë të vërtetë."

Zemërimi i popullit
Zemërimi i popullitFotografi: picture-alliance/dpa

Dr. Hassan Abu Taleb është studiues i shkencave politike në Qendrën Al Ahram në Kajro. Ai nuk e ka fshehur kurrë antipatinë e tij ndaj regjimit të Mubarakut. Por edhe fushata e linçimit, që po vrojton tani, i është pështirosur. Megjithatë, ajo po tregon efekt në rrugët e Kajros, si te këta të rinj: "Dënim me vdekje, natyrisht që Mubaraku e meriton dënimin me vdekje, nuk lejohet kurrsesi të shpëtojë. Në të kaluarën është thënë gjithmonë, se ai ka qenë hero i luftës së tetorit, por kur ka qenë hero, përse e dëmtoi kaq popullin e vet. 30 vjet korrupsion, ky ishte Mubaraku. Ai nuk ishte president, po kapobandë."

Nuk ka shumë nga ata, që bëjnë thirrje për maturi në trajtimin e pushtetarit të rrëzuar. Ata, që guxojnë ta bëjnë këtë, janë pikërisht njerëzit, të cilët kur Mubaraku ishte në pushtet, urdhëroi t'i burgosin, ndonjëherë edhe t'i torturonin.

Autor: Martin Durm/Elert Ajazaj

Redaktoi: Angjelina Verbica