De Maiziere flet për kthimin e refugjatëve për në Greqi

Ministri i Brendshëm gjerman Thomas de Maiziere tha për gazetën "Welt am Sonntag" se dëshiron t'i kthehejë sërish për në Greqi refugjatët që vijnë nga ky vend.

"Ne kemi bërë shumë në Evropë, në mënyrë që situata e refugjatëve në Greqi të përmirësohet ", tha de Maiziere për këtë gazetë. "Kjo duhet të ketë si rrjedhojë që të jetë e mundur që refugjatët të ekstradohen për në Greqi sipas rregullave të marrëveshjes së Dublinit."

Sipas marrëveshjes së Dublinit kërkesa për azil e një personi që hyn në një nga shtetet anëtare të BE-së duhet të shqyrtohet në vendin ku person shkel për herë të parë territorin e BE-së. Për shkak të mangësive në sistemin grek të shqyrtimit të kërkesave për azil dhe të numrit të madh të njerëzve që hyjnë në Greqi, Gjermania e ka pezulluar ekstradimin e refugjatëve në këtë vend që nga viti 2011.

De Maiziere tha se Bashkimi Evropian duhet të zhvillojë një mënyrë të përbashkët trajtimi për refugjatët dhe Gjermania nuk mund ta zbatojë një politikë të tillë e vetme. "Nëse ne e trajtojmë këtë problem të vetëm, atëherë ekziston rreziku që brenda një periudhe të shkurtër gjykatat administrative do t'i bllokojnë dëbimet," tha ai.

Komentet e ministrit vijnë një vit pasi Gjermania hapi kufijtë e saj për rreth 1 milion refugjatë, shumë prej të cilëve kishin hyrë për herë të parë në territorin e BE-së përmes Greqisë. Jo të gjithë të ardhurit kanë të drejtë për azil në Gjermani. Përpunimi i kërkesave për azil dhe ekstradimi në rast mosmiratimi është një proces i gjatë dhe i ngadalshëm.

Në Greqi ka ende më shumë se 50.000 emigrantë. Shumë prej tyre kanë kërkuar azil në Greqi, pasi mundësitë për të vazhduan rrugën drejt Evropës veriore janë pakësuar për shkak të mbylljes së rrugës ballkanike dhe marrëveshjes së BE-së me Turqinë për t'i rikthyer në kampet turke refugjatët që vijnë përmes Detit Egje.