1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Meta: Gjysëm KQZ-ja nuk na pengon për një proces të ndershëm zgjedhjesh

Situata politike në prag të zgjedhjeve parlamentare në Shqipëri, roli i KQZ së paplotë në këto zgjedhje dhe miratimi i tre ligjeve janë fokus të bisedës së DW me Kryetarin e LSI, Ilir Metën.

default

DW: Zoti Meta, a mund të shkojnë shqiptarët në zgjedhjet parlamentare të 23 qershorit me një KQZ të paplotë?

Meta: Opozita ka bërë të gjitha përpjekjet e saj konstruktive për të evituar një situatë të tillë, pra një ngërç të tillë politik, që është krijuar nga një gjysëm KQZ-je. Ajo ka qenë tërësisht reflektare, kur mazhoranca duke shkelur Kushtetutën, kodin zgjedhor dhe konsensusin realizoi dhunimin e Komisionit Qëndror të Zgjedhjeve. Në këto kushte opozita në Shqipëri ka treguar vetëpërmbajtje. Ajo natyrisht që ka demonstruar vullnetin e saj të plotë për të bërë gjithçka që është e mundur që situata lidhur me standartin e zgjedhjeve të mos përkeqësohet më tej. Ka marrë pjesë dhe po merr pjesë aktive në të gjitha nivelet e tjera të administrimit dhe është e koncentruar në mbrojtjen e votës së çdo qytetari shqiptar dhe do të vazhdojë të kontribuojë në mënyrë konstruktive për të patur zgjedhje të lira e të ndershme, pavarësisht nga gjendja në të cilën ndodhet KQZ-ja dhe standarti që ajo përfaqëson tashmë.

DW: Nisur nga përvoja e hidhur në këto vitet e fundit me KQZ, të krijohet përshtypja se do të kemi përsëri situata acaruese pas procesit zgjedhor, deri edhe në stërzgjatje të njohjes së rezultateve apo të mosnjohjes së tyre. Pra edhe një krizë politike më pas. Ju jeni të këtij mendimi?

Meta: Ne jemi të prirur si opozitë që me një vullnet të mirë ti shërbejmë jo acarimit të situatës politike. Ne jemi për një mbarëvajtje të procesit zgjedhor pavarësisht nga gjendja që ndodhet KQZ-ja e cila çdo ditë në fakt kompromenton karakterin e saj patriark në vendimet e ndryshme që merr, por absolutisht që kjo nuk e pengon opozitën që të ketë besim të plotë dhe të angazhohet totalisht për të marrë pjesë në të gjitha nivelet e administrimit zgjedhor dhe për të garantuar integritetin e votës së çdo qytetari shqiptar. Në rast se do të ketë përpjekje të tjera për të vendosur dorë mbi procesin zgjedhor dhe mbi votën e qytetarëve shqiptarë, atëherë përgjegjësinë nuk do ta mbajë vetëm gjysëm KQZ-ja, por ata që provokuan këtë përçdunim të këtij institucioni të pavarur kushtetues dhe që nuk durojnë dot të presin me qetësi verdiktin e lirë dhe të drejtë të mbarë qytetarëve shqiptarë.

DW: Nuk do të ishte më mirë zoti Meta që të zevëndësoheshin këta tre anëtarë të Komisionit, duke i prerë rrugën kështu çdo provokimi të ardhshëm? A ka shanse për një kompromis dhe një arritje konsensusi që di t'i paraprinte një situate më të sigurtë zgjedhjesh?

Meta: Sigurisht që më e mira do të ishte që Komisioni, pra ky insititucion i pavarur të mos ishte dhunuar. Por pas kësaj që ka ndodhur nuk mendoj se është detyra e opozitës që thjesht të çojë tre emra, apo të punësojë thjesht tre përfaqësues, tre ekspertë të tjerë, kur askush në Shqipëri nuk beson më se pas atentatit që iu bë pavarësisë dhe integritetit të KQZ, mund të tejkalohet kjo gjë.

DW: Por a mund të vërë kjo në diskutim rezultatin zgjedhor?

Meta: Normalisht zgjedhjet nuk bëhen në KQZ, ato zhvillohen në qendrat e votimit dhe në qendrat e numërimit dhe në Komisionet zonale, ku opozita ka marrë pjesë dhe do të marrë pjesë duke kontribuar në atë që të garantohet standarti gjatë ditës së votimit dhe në atë të numërimit të votave. Në rast se gjysëm-KQZ-ja do të përpiqet të ndërhyjë në verdiktin që do të japin qytetarët shqiptarë, atëhere po e theksoj edhe një herë se nuk do të jetë përgjegjsia e gjysëm-KQZ-s, por e atyre që e prodhuan këtë gjysëm-KQZ.

DW: Zoti Meta, edhe pse situata duket jo e këndshme në këtë prag zgjedhjesh, në një kohë që BE pret standarte vërtet të larta më 23 qershor, ju jeni i vetmi politikan që këmbëngulni megjithatë në miratimin e tre ligjeve. Pse gjithë ky insistim tani?

Meta: Këmbëngulja ime lidhet në fakt me dëshirën jo vetëm timen, por besoj të të gjithë shqiptarëve, që Shqipëria të marrë statusin e vendit kandidat brenda këtij viti. Dhe nëse këto tre ligje nuk do të miratohen brënda këtyre ditëve, atëhere çështja e statusit jo vetëm që është e pamundur të merret brenda këtij viti, pra deri në muajin dhjetor, por ajo mund të shtyhet në kalendat greke. Unë mendoj se kjo do të ishte një fatkeqësi e madhe që ne të humbisnim një mundësi shumë të madhe, e cila nuk ka të bëjë me fatin e një partie apo thjesht të forcave politike, por ka të bëjë me interesin e të gjithë qytetarëve shqiptarë, me kredibilitetin e vendit, me kredibilitetin e Shqipërisë si faktor paqeje dhe stabiliteti në rajonin e Ballkanit.

Intervistoi: Mimoza Cika-Kelmendi

Redaktoi: Auron Dodi