Medvedjev shprehet për një pauzë medituese në lidhje me Kosovën | Gjermania | DW | 05.06.2008
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Medvedjev shprehet për një pauzë medituese në lidhje me Kosovën

Presidenti rus bën vizitën e tij të parë zyrtare në Berlin

default

Medvedjev dhe Merkel në Berlin

Në një fjalim që mbajti në mbrëmje në Hotelin Interconti, Dmitrij Medvedjev u shpreh për një pauzë të shkurtër në disa pika të politikës së jashtme, mes tyre edhe Kosovën. Moskën shpesh e quajnë pasive e të rezervuar në politikën e jashtme, tha Medvedjev, por unë ua rekomandoj të gjithëve vetëpërmbahen.

"Ne duhet t'i japim fund rrethit vicioz të hapave unilaterale dhe reagimeve ndaj tyre. Ne duhet të heqim dorë nga thellimi i konflikteve dhe politika e fakteve të kryera. Ndoshta do të duhet të bëjmë një pauzë të vogël dhe të shikojmë se ku ndodhemi e ku kemi ngecur, qoftë në çështjen e Kosovës, qoftë në zgjerimin e Nato-s, qoftë në çështjen e sistemit antiraketor", tha ai gjatë një fjalimi të mbajtur të enjten në mbërmje para përfaqësuesve të ndryshëm nga politika, ekonomia dhe mediet, që u mbajt në Hotelin Interconti në Berlin.

Kancelarja gjermane Angela Merkel, e cila e pat pritur atë më parë në zyrën e saj, nuk i përmendi fare këto tema në konferencën e përbashkët të shtypit. Në një mesazh të transmetuar në fundjavë në një videoklip ajo kishte anoncuar se do të fliste me presidentin e ri të Rusisë edhe për çështje të tilla, si Irani apo Kosova.

Merkel preferoi të përqendrohej në planin bilateral:, që do të thotë në temën e gazjellësit rus "North Stream" që po ndërtohet nga koncerni rus Gazprom e do të kalojë përmes Baltikut. Angela Merkel tha se e vlerëson këtë projekt për nga rëndësia strategjike, por tha se duhet një dialog i hapur për të mënjanuar dyshimet: "Këto dyshime kanë të bëjnë me faktin që disa vende mund të përjashtohen ose që projekti mund të jetë i drejtaur kundër këtyre vendeve", tha Merkel.

Fjala është kryesisht për Poloninë e cila ishte e para që protestoi për marrëveshjen e nënshkruar qysh në kohën e kancelarit gjerman Gerhard Shrëder (Schröder), i cili aktualisht është kryetar i këshillit të aksionerëve të "North Stream".

Merkel gjithashtu u shpreh për intensifikimin e marrëdhënieve mes Rusisë dhe Nato-s dhe BE-së.

Kancelarja gjermane shprehu gatishmërinë e saj për t'u angazhuar më shumë për modernizimin e ndërtimit e shtetit ligjor në Rusi. Presidenti rus premtoi se do të merret vetë me këtë çështje dhe e quajti atë me prioritet shtetëror.

Gjatë qendrimit të tij në Berlin, Medvedjev pati takime edhe me ministrin e jashtëm, Frank Walter Steinmeier (Valter-Shtajnmajer) dhe presidentin e Gjermanisë, Horst Këler (Köhler).

  • Data 05.06.2008
  • Autor Anila Shuka
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/EEOC
  • Data 05.06.2008
  • Autor Anila Shuka
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/EEOC