Mbahet seanca konstituuese e parlamentit të ri gjerman

Deputetët e parlamentit të ri gjerman u mblodhën sot në takimin e tyre të parë. Deputeti më i moshuar, Heinz Riesenhuber (CDU), hapi seancën, në të cilën merrnin pjesë 631 përfaqësuesit e zgjedhur. Në fjalimin e tij 77 vjeçari përshëndeti „të rinjtë“ në parlament dhe kujtoi kolegët e grupit parlamentar të demokratëve të lirë, që nuk janë më të përfaqësuar në parlament. Riesenhuber u kujtoi deputetëve sfidat e mëdha, që vijnë nga ndryshimi demografik dhe pasojat e tij në politikat e tregut të punës dhe familjes. Tranzicionin në përftimin e energjisë ai e quajti një detyrë të madhe komplekse, e cila duhet të derdhë në një „ekonominë dhe mjedisin“. Riesenhuber i inkurajoi kolegët e tij që të arrijnë kompromisin për krijimin e qeverisë, sepse nuk duhet të ketë qëndrim në vend.

Ndoshta do të ishte e dobishme, tha Riesenhuber, sikur deputetët e grupeve të ndryshme parlamentare të pinin nga një birrë me njëri-tjetrin. Deputetët e ndërprenë fjalimin plot humor me duartrokitje dhe të qeshura. Pas fjalës së tij Riesenhuberi ia la vendin zgjedhjes së kryetarit të parlamentit dhe zëvendësve të tij.

Siç pritej detyrën e kryetarit të parlamentit do ta kryejë politikani i Unionit Kristian Demokrat (CDU), Norbert Lammert , i cili mban këtë post që nga viti 2005. Për të votuan 591 deputetë. Pati 26 vota kundër dhe tetë abstenime. Lammert falendëroi grupin e tij parlamentar për nominimin, „edhe pse ai e di se mënyra se si i kuptoj unë detyrat, që lidhen me këtë post, nuk shkaktojnë gjithmonë eufori.“

Në fjalimin e tij politikani i Unionit Kristian Demokrat Lammert theksoi se parlamenti nuk duhet të presë përfundimin e negociatave për koalicionin qeverisës, që të fillojë punën e tij, kontrollin e qeverisë. Lammert shprehu keqardhjen për pikat e shumta të rendit të ditës, që në të kaluarën janë trajtuar pa debate. "Ne kemi nevojë ose për më shumë disiplinë, ose për më shumë javë seancash."

Në fjalën e tij Lammert theksoi rritjen e numrit të grave në parlament, me rreth katër përqind në 36,3%. Në parlamentin e ri ka 402 deputetë dhe 229 deputete. Më i riu në mesin e tyre është Mahmut Özdemir nga PSD, i lindur 1987, dhe më e reja është deputetja e Unionit Kristian Social (CSU), Emmi Zeulner, e lindur po ashtu 1987. 230 deputetë janë për herë të parë në parlament. "Demokracia është një formë e qeverisjes, në të cilën nuk qeveriset më mirë, nga sa e meriton", tha Lammert në fund.

Pas kësaj u zgjodhën zëvendëskryetarët e parlamentit. Që këtu doli në shesh hendeku ndërmjet PSD dhe Unionit nga njëra anë dhe të Gjelbërve dhe të Majtëve ana ana tjetër. Partitë e mëdha e kanë realizuar kërkesën e tyre për gjashtë vende zëvendëskryetarësh. Në të ardhmen do të ketë dy zëvendëskryetarë nga Unioni, dy nga PSD dhe një nga të Majtët dhe të Gjelbrit.

64 deputetët e së Majtës dhe 63 deputetët ekologjistë kanë dyshime të mëdha, nëse do ta kryejnë siç duhet rolin e opozitës në rastin e një koalicioni të madh. Humbja në përcaktimin e numrit të nënkryetarëve mund të merret si preludi i kohëve të vështira.