1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Makutëri apo dukuri e pashmangshme?

Koncerni i automobilëve në Gjermani, BMW, publikoi të mërkurën (27.2.) shifrat e shkurtimit të vendeve të punës. Kjo është pasoja e një zinxhiri të gjatë të procesesh të ngjashme në koncernet gjermane.

Fabrika e BMW-së në Lajpcig

Fabrika e BMW-së në Lajpcig

Ndonëse në seri koncernet e mëdha gjermane kohët e fundit njoftojnë për fitime rekord, paralelisht ato publikojnë edhe planet për shkrutim të vendeve të punës. Janë të shumtë ata që e vlerësojnë këtë si një paradoks dhe nga ana tjetër si një dëshmi për makutërinë e gardës së menaxherëve. Por jo të gjithë ndajnë të njëjtin mendim. Qysh përpara Krishtlindjeve u bënë të njohura planet e koncernit bavarez të automobilëve, BMW, por shifrat konkrete mungonin. Të mërkurën (27.2.) koncerni i publikoi ato: Mbi 8.000 vende pune do të shkurtohen, e nëse kursi i euros do të mbetet mbi 1.50 dollarë ndoshta do të ketë edhe më shumë shkurtime. Fitime rekord nga njëra anë dhe shkurtim i vendeve të punës nga ana tjetër, një dukuri e tillë nuk është kontradiktore as për prodhuesin e solucioneve larëse dhe lëndëve ngjitëse, Henkel nga Dyseldorfi. Shefi i koncernit, që së shpejti do të largohet nga posti, Ulrich Lehner ka një shpjegim për këtë: "Ne përgatitemi për zhvillimet e ardhshme dhe duke u nisur nga pozicioni i të fortit duam të sigurojmë aftësinë e sipërmarrjes edhe për të ardhmen."
Fabrika e Siemensit në Mynih njofton shkurtimin e vendeve të punës

Fabrika e Siemensit në Mynih njofton shkurtimin e vendeve të punës

Të martën (26.2.) koncerni i elektroteknikës Siemens, deklaroi, se do të shkurtojë në mbarë botën gati 7.000 vende pune, rreth 3.200 vetëm në Gjermani. Prodhuesi i makinerive dhe automjeteve të transportit MAN gjatë 15 viteve të ardhëshme do t´i transferojë qendrat e prodhimit nga Gjermania në vendet me nivel më të ulët page. Koncerni amë i Dresdner-Bank, Allianz ndërkohë ka njoftuar shkurtimin e 450 vendeve të punës në filialin investues Dresdner. Edhe furnizuesi i pjesëve të këmbimit për industrinë e prodhimit të automobilëve Continental, që është i pesti në botë, do të shkurtojë 2.000 vende pune. Pa harruar këtu Nokia-n, ku deri tani kanë humbur mijëra vende pune.

Protestë kundër shkurtimit të vendeve të punës tek Deutsche Bank, 2005

Protestë kundër shkurtimit të vendeve të punës tek Deutsche Bank, 2005

Koncernet shkurtojnë e shkurtojnë vendet e punës, ndonëse fitojnë gjithnjë e më shumë. Por Norbert Walter, shef i në sektorin ekonomik të Deutschen Bank ka një shpjegim për këtë dukuri: "Shkurtimi i vendeve të punës është mëse e qartë që nuk bëhet për shkak të fitimeve të mëdha, por sepse kanë ndryshuar proceset teknologjike, sepse ndarja e punës në nivelin ndërkombëtar është e ndryshueshme dhe nga ana tjetër është e nevojshme që të ndryshohet. Unë besoj, se ne në të kaluarën nuk kemi qenë të përgatitur për t´iu përshtatur shpejt ndryshimeve në një sërë sektorësh. Tani ndryshimet janë urgjentisht të nevojshme, sepse brutalisht kanë ndryshuar edhe kushtet e kursit të këmbimit."

Mercedes shkurton vendet e punës, 2005

Mercedes shkurton vendet e punës, 2005

Gjermania aktualisht prodhon me kosto shumë të lartë në raport me kursin e këmbimit, por sipas ekspertit Walter: "Ky nuk është një fenom specifik gjerman. Ky është një fenomen i zonës së euros."

  • Data 28.02.2008
  • Autor Ulla Herrmann (HR) / Jutta Wasserrab
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/DF31
  • Data 28.02.2008
  • Autor Ulla Herrmann (HR) / Jutta Wasserrab
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/DF31