1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Kosova shënon Ditën Ndërkombëtare të Personave të Zhdukur

Dita Ndërkombëtare e Personave të Zhdukur (30.08) është për familjet e viktimave vetëm njëra prej shumë ditësh ankthi. Familjarët ende nuk kanë gjetur eshtrat e të paktën 1700 vetëve.

Kosova po shënon Ditën Ndërkombëtare të Personave të Zhdukur. Edhe pse kanë kaluar 17 vjet nga përfundimi i luftës familjarët ende nuk kanë gjetur eshtrat e të paktën 1700 vetëve. Të njëjtin problem e ka dhe Bosnja qe numëron rreth 7 800 persona të humbur dhe Kroacia me mbi 2 mijë vetë.

Këshilli Organizativ për shënimin e 30 Gushtit i përbërë nga përfaqësues të Komisionit Parlamentar për të Drejtat e Njeriut, Barazi Gjinore, Persona të Pagjetur dhe Peticione, Komisionit Qeveritar për Persona të Zhdukur dhe Këshillit Koordinues të Asociacioneve Familjare të të Zhdukurve të Kosovës, kanë organizuar disa aktivitete me rastin e Ditës Ndërkombëtare të Personave të Zhdukur, ndër të tjera një tryezë me temën: ‘Dita Ndërkombëtare e Personave të Zhdukur – rasti i Kosovës', vendosje lulesh te ‘Përmendorja dedikuar personave të zhdukur' përballë Kuvendit të Republikës së Kosovës dhe tubimin Qendror, në Merdar, Komuna e Podujevës.