1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Kompania britanike Deloitte – skaner për financat publike në Shqipëri

Kompania britanike Deloitte do të marrë 85 mijë euro për auditimin e financave publike të Shqipërisë.

Sa janë borxhet që shteti në Shqipëri u ka bizneseve të huaja, apo vendase? Këtë do ta bëjë të qartë në fund të muajit nëntor të këtij viti kompania Deloitte, e ardhur në Shqipëri në 1998 për zbardhjen e çështjeve financiare të skemave piramidale. Tani është qeveria Rama, që me një akt normativ të miratuar në parlament dhe të kundërshtuar nga PD në opozitë, risjell Deloitte për të zbardhur situatën e financave publike dhe sidomos të borxhit publik. Shifrat, që qarkullojnë janë të ndryshme, nga 64 % të prodhimit të brendshëm bruto deri në 74%. Kundërshtitë dhe debatet politike mes maxhorancës së majtë, që po qeveris që prej dy muajsh dhe opozitës së djathtë ,që qeverisi nga për 8 vjet, lidhur me nivelin e borxhit publik, mbeten të ashpra dhe pa asnjë shenjë konverguese. Deloitte shfaqet si një arbitër mes palëve për të mbyllur debatin dhe hapur nje kapitull te ri. “Ky auditim shërben për t’i kthyer bizneset nga problemi numër një i rritjes, në faktor të rritjes. Të fillojë një faqe e re për të krijuar vende të reja pune, për të nxitur investime prodhuese dhe për të realizuar programin qeverisës të rilindjes shqiptare”, tha kryeminstri Rama, pas miratimit të aktit normative të qeverisë nga Parlamenti për angazhimin e Deloitte në zbardhjen e borxhit publik.

Angazhim i Deloitte - vendim politik

Prof. Dr. Ardian Civici

Prof. Dr. Ardian Civici

Prof. Dr. Adrian Civici, rektor në Universitetin e Tiranës dhe një personalitet i mirënjohur në fushën e ekonomisë, thotë për DW se kryerja e auditit nga Deloittedhe jo institucionet shteterore vendase ka një arsye qendrore: “Në Shqipëri mungon besimi reciprok në sferën politike dhe vendimmarje lidhur me shifrat kryesore, që kanë të bëjnë me nivelin makroekonomik të vendit, shifrat financiare, apo ato të papunësisë. Kemi qënë dëshmitarë në gjithë këto vite të debateve pozitë-opozitë për vërtetësinë e shifrave të prodhuara nga INSTA-i, apo institucione të tjera të rëndësishme. Marrja e një kompanie të huaj për të bërë auditimin e financave shqiptare në kushtet e borxhit të lartë publik, faturave të papaguara të biznesit dhe detyrimeve të lëna në mes të rrugës, më shumë sesa një kërkesë për shkak të profesionalizmit të munguar në Shqipëri është një vendim politik për t’i dhënë fund debatit, që gjithçka që bëhet nga institucionet vendase vihet në dyshim nga njëra palë politike. Është e nevojshmë që në këtë moment një instucion serioz si Deloitte të japë në mënyrë të besueshme dhe të pranueshme nga të gjitha palët shifrat kryesore të financave publike dhe situatës financiare në Shqipëri”, thote Prof. Dr. Adrian Civici.

Sybi Hida

Sybi Hida

Sybi Hida, ekonomist, me përvoja pune në FMN, ish deputet i PD, ka të njëjtim mendim: “Ky është një vendim politik i qeverisë Rama: ai i përgjigjet situatës politike në Shqipëri, kur nuk ka konsensus politik mes palëve për çështje të financave publike. Kryeministri Rama ”po blen” kredibilitet, pra që në debatet, që do të ketë me opozitën të përdorë kredibilitetin e kësaj kompanie. Punën e Deloitte mund ta bëjnë specialistët e Ministrisë së Financave. Është për të ardhur keq që vazhdon mungesa e konsensusit politik mes palëve, kur ekonomia shqiptare ka nevojë për bashkëpunim, debate të thella teknike dhe jo mospërputhje treguesish dhe shifrash qe janë të kontabilizuara. Mendoj që kryeministri Rama mund të ishte treguar më i guximshëm, pasi shqiptarët ia dhanë kredibilitetin me votën e tyre më 23 qershor dhe ai nuk kishte pse shmangej nga debati politik lidhur me auditimin e financave publike nga institucionet përkatëse vendasse”, thotë Sybi Hida.


Kosto financiare për buxhetin modest të Shqipërisë?

Kompania britanike Deloitte do të marrë 85 mijë euro për auditimin e financave publike të Shqipërisë. “Është një kosto e dyfishtë financiare, institucionet shqiptare mund të bëjnë vlerësimin e financave publike, por në klimën e mosbesimit politik, është e vetmja rrugë për t’i dhënë një lloj legjitimiteti një moment “zero”, ku do të fillohet interpretimi edhe i shumë vendimeve, që do të merren lidhur me financat publike. 85 mijë euro nuk përbëjnë një kosto të madhe në raport me besimin, që do të kenë palët, se këto janë shifrat reale dhe shumë nga vendimet e rëndësishme duhen marrë mbështetur tek këto shifra. Dyshimi për shifrat krijon një kaos në vendimmarrje dhe dobia është shumë e madhe, nëse punohet me shifra të pranueshme nga të githa palët dhe të certifikuara. Në Shqipëri mbizotëron zhurma dhe debati politik shpesh herë për çështje të “kuzhinës së brendshme”, sesa për atë që është reale. Deloitte është një kompani auditimi, që ka kompetencat për të bërë auditimin”, thotë Prof. Dr. Civici. Të njëjtat konsiderata shpreh për Deloitte edhe Sybi Hida. ”Nuk mund të vëmë në dyshim reputacionin e Deloitte, kompani multinacionale me reputacion të lartë”, thote ai për DW.

Deloitte - përfitime përtej zbardhjes së financave publike.

Nga auditimi i financave publike prej Deloitte, qeveria e Tiranës mund të ketë edhe përfitime të tjera.“ Si një kompani e specializuar në auditime dhe mirëmenaxhimin e treguesve buxhetorë, bilanceve financiare të kompanive, Deloitte mund të japë edhe rekomandime për menaxhimin e buxhetit të shtetit, të borxhit publik, funksionimin e financave publike dhe mund të jetë e dobishme që fenomene negative të mos ndodhin në të ardhmen”, thotë Sybi Hida. Auditimi nga Deloitte behët në një moment të vështirë financiar dhe ekonomik për Shqipërinë, kur parashikohet që rritja ekonomike në vitin 2014 nuk do të jetë më e madhe se 1,5- 2% dhe kur sfida më e madhe mbetet rritja ekonomike, investimet prodhuese, investimet e huaja direkte dhe vënia në eficencë sa më shpejt e sektorëve kyç të ekonomisë. “Kryefjala e rritjes ekonomike do të jetë rritja e prodhimit vendas, shtimi i eksporteve, hapja e vendeve të reja të punës, futja në eficencë sa më shpejt e minierave, prodhimi i energjisë elektrike, shkurt, gjithçka që lidhet me prodhimin”, thotë Prof. Dr Adrian Civici.