1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Kërkohen shkaktarët e trazirave në Mitrovicë

Përfaqësues nga politika shqiptare dhe ajo serbe kanë kërkuar nga prania ndërkombëtare në Kosovë që të përfundojnë sa më shpejt hetimet lidhur me incidentet e fundit në Mitrovicë.

default

Shtëpi e shkatërruar në Mitrovicë

Hetimet për ngjarjen e Mitrovicës janë duke vazhduar, por ende nuk është gjetur fajtori. Pas trazirave shqiptarët dhe serbët fajësuan njëri tjetrin për incidentet ku pati edhe të lënduar nga armët e zjarrit. Në deklarimet e para pas incidenteve, udhëheqësit politikë kosovarë akuzuan serbët dhe Beogradin si nxitës të trazirave. Ndërsa serbët e veriut dhe Beogradi thanë se ishin shqiptarët ata që provokuan dhunë. Megjithatë të dyja palët pajtohen në një pikë. Ata kërkojnë nga autoritetet ndërkombëtare përgjegjëse për sigurinë zbardhjen e rasteve.

Kryetari i Këshillit Kombëtar të serbëve të veriut, Dragan Veliq, konstaton se kalimi i përgjegjësive nga UNMIK-u tek misioni EULEX, ka shkaktuar një vakum në sektorin e sigurisë dhe kjo ka bërë që akoma të mos dihet se kush ishte fajtori për ngjarjet në Mitrovicë. Veliq: "Ne i bëjmë thirrje komunitetit ndërkombëtar që t'i zbulojnë nxitësit e trazirave dhe në radhë të parë presim që këtë ta bëjë UNMIK-u, por edhe misioni EULEX-i, i cili në fillim të mandatit ka premtuar se do të garantojë stabilitet në Kosovë. Kemi dëgjuar shumë zëra që thonë se trazirat kanë për synim ndarjen e veriut. Unë them se, nëse dikush synon që përmes trazirave të arrijë ndonjë zgjidhje, e cila mund t'i ngjajë edhe ndarjes, atëherë ky është një projekt shumë i rrezikshëm që nuk do të sjellë kurrfarë zgjidhje".

Përfaqësuesit e serbëve të veriut kanë frikë se ngjarjet në Mitrovicë mund të provokojnë skenare të ngjashëm edhe në vendbanimet e tjera serbe në Kosovë. Ata kërkojnë forcimin e masave të sigurisë nëpër vendbanimet serbe. Forca të shtuara të sigurisë ka në veri të Kosovës por jo nëpër vendbanimet e tjera me shumicë serbe, sepse sipas organeve të rendit nuk ka të dhëna se rrezikohet siguria e enklavave serbe në rajonet tjera të Kosovës.

Ekperti për çështjet e sigurisë, Lulzim Peçi thotë se përgjegjësia për dhunën në Mitrovicë duhet kërkuar tek Beogradi zyrtar: "Serbia e ka pranuar deklarativisht misionin EULEX, por në anën tjetër është shumë e interesuar që ta diskreditojë këtë mision, sepse diskreditimi i EULEX-it, nënkupton edhe diskreditim të qeverisjes në Kosovë dhe në anën tjetër Serbia përmes kësaj strategjie tenton që zonën e veriut ta bëjë një zonë me status të veçantë që më vonë të kemi dhe deri tek ndarja" thotë Lulzim Peci.

Organet e rendit thonë se hetimet për ngjarjet e fundit që ndodhën në Mitrovicë janë në rrugë të mirë. Për ta shkaktarët e trazirave janë të njohur për policinë, por nuk japin shumë detaje. Sipas tyre shumë shpejt do të ketë arrestime.

  • Data 09.01.2009
  • Autor Bekim Shehu
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/GVAq
  • Data 09.01.2009
  • Autor Bekim Shehu
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/GVAq