"Jo demokratike dhe antikushtetuese"

Ombrella e përhershme e shpëtimit të euros, ESM, përbëhet prej 700 miliardë eurosh. Kjo sasi parash vihet në dispozicion prej 17 vendeve të eurozonës. Secili vend mund ta paguajë shumën përkatëse, me të cilin i takon të kontribuojë për rezervën prej 700 miliardë eurosh, ose direkt tek fondi i shpëtimit, ose ta mbajë në dispozion për ta lëvruar menjëherë në rast nevoje.

Fondi për shpëtimin e euros, ESM, dhe pakti fiskal ishin dy ligjet e miratuara me shumicë votash si nga pozita dhe nga opozita në seancën e fundit të parlamentit gjerman para fillimit të pushimeve të verës (29.6.) Pas Bundestagut, të premten në mbrëmje ligjet përkatëse i miratoi me shumicë dy të tretash edhe Këshilli i Landeve. Sipas kancelares Merkel mes paktit fiskal dhe fondit të përhershëm të shpëtimit të euros ESM ekziston një lidhje ligjore dhe rikapitalizimi direkt i bankave do të jetë i mundur vetëm atëherë kur të jetë krijuar një mbikqyrje e përbashkët bankare për eurozonën.

Menjëherë pas miratimit në dy dhomat e parlamentit në Gjykatën Kushtetuese gjermane në Karlsruhe mbërritën paditë e para. Njëra vjen prej grupit parlamentar të partisë "E Majta", i cili votoi në parlament njëzëri kundër ESM-së dhe paktit fiskal. Madje të majtët kishin paralajmëruar qysh përpara debatit në Bundestag se menjëherë pas votimit do të paraqisnin padi në Gjykatën Kushtetuese.

Padi nga nismat qytetare dhe parlamentarë

Padi ndaj instrumenteve për shpëtimin e euros ngre edhe "Aleanca për ankesë kushtetuese për ESM dhe paktin fiskal", e cila ka rreth vetes 12.015 anëtarë. Në krye të aleancës, në të cilën bëjnë pjesë disa parti të vogla, janë edhe profesori i së drejtës kushtetuese pranë Universitetit të Leipzigut Christoph Degenhart dhe ish-ministrja federale e Drejtësisë Herta Daeubler-Gmelin.

Ndër paditësit në Gjykatën Kushtetuese bëjnë pjesë edhe të ashtuquajturit "disidentë", deputetë të grupeve parlamentare të partive në qeveri, të cilët nuk pranuan të miratonin paktin fiskal dhe ombrellën e shpëtimit, si p.sh. deputeti kristian-social (CSU) Peter Gauweiler dhe ai liberal (FDP) Frank Schäfler.

"Pakti fiskal dhe Ombrella e përhershme e shpëtimit të euros, ESM, duhet të bëhen në përputhje me parimet kushtetuese të Gjermanisë dhe të Evropës, pra së bashku me qytetarët." - tha Herta Däubler-Gmelin para votimit parlamentar për ESM dhe paktin fiskal.

Kritikat janë të forta: Nga njëra anë, hiqet dorë nga parimi që një shtet anëtar nuk duhet të përgjigjet për borxhin e një shteti tjetër. Nga ana tjetër shtetet anëtare mbajnë në fund të fundit përgjegjësi të pakufizuar, nëse këshilli i guvernatorëve vendos një gjë të tillë - për shembull në qoftë se disa shtete nuk mund t'i paguajnë kontributet e tyre, thuhet në memorandumin e profesorit të së drejtës kushtetuese pranë Universitetit të Leipzigut Christoph Degenhart.

Shanset për sukses?

Nëse ankesat dhe paditë kanë shanse për sukses në Gjykatën Kushtetuese në Karlsruhe, është e vështirë të parashikohet. Nga njëra anë, gjykata më e lartë gjermane ka bërë vazhdimisht të qartë se edhe në rastin e shpëtimit të euros duhet të respektohet e drejta e bashkëveprimit të Bundestagut. Nga ana tjetër sidomos përfaqësuesit e ekonomisë janë të mendimit që masat janë konform kushtetutës.

Patrick Sensburg, deputet i CDU-së në parlamentin gjerman dhe kryetar i nënkomitetit për të drejtën evropiane në Bundestag, tërheq vëmendjen ndaj riorganizimit të të drejtave të parlamentit për pjesëmarrje në lidhje me ESM. Për këtë nuk mund të ngresh ankesë mendon Sensburg. Sipas tij edhe modalitetet e votimit për ESM janë rregulluar në mënyrë të mjaftueshme.