1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Java për Kosovën në Regensburg

Në Regensburg të Gjermanisë filloi mbrëmë java shkencore me temë “Kosova – një vit pas pavarësisë”. Aktiviteti përmban një sërë referatesh dhe seminaresh rreth problemeve aktuale politike dhe shoqërore të Kosovës.

Ura gotike, Regensburg

Ura gotike, Regensburg

Në analizën që i bënë gjendjes aktuale në Kosovë, dy referuesit e mbrëmjes hapëse Johanna Deimel dhe Michael Martens, theksuan përgjegjësinë e BE-së ndaj Kosovës. Problemi i Kosovës duhet zgjidhur mundësisht brenda vitit, para se të vijë Spanja në krye të BE-së, argumentoi Johanna Deimel, e cila vitin e kaluar ka punuar në Zyrën Ndërkombëtare Civile të holandezit Peter Feith. “Bashkimi Evropian duhet të jetë me mendim unik në lidhje me të ardhmen e Kosovës dhe duhet të zgjedhë një rrugë sa më pragmatike për ta shoqëruar atë drejt pavarësimit. Por, unë shoh një problem të madh tek Spanja, e cila nuk i kursen fjalët kundër pavarësisë së Kosovës. Një shembull në këtë drejtim ishte edhe paralajmërimi i nxituar për tërheqjen e trupave”, tha Deimel.

Gzetari i Frankfurter Allgemeine Zeitung, Michael Martens

Për gazetarin e "Frankfurter Allgemeine Zeitung", Michael Martens, problemi kryesor i Kosovës është mospërfshirja në politikat e liberalizimit të vizave të BE-së.

Për gazetarin e së përditshmes gjermane "Frankfurter Allgemeine Zeitung", Michael Martens, problemi kryesor i Kosovës është fakti, që ndryshe nga Serbia, ajo është përjashtuar nga politika e liberalizimit të vizave: “Kosova ka një gjendje shumë të vështirë ekonomike dhe kjo është shumë e lidhur me mungesën e liridaljes. Emigracioni ka shërbyer prej qindra vjetësh si ventil për daljen nga kriza ekonomike”, arsyetoi korrespondenti nga Beogradi.

Arsimi në fokus

Një rrugë tjetër afatgjate për përballjen e problemeve ekonomike është investimi në kapitalin njerëzor, është i mendimit Conrad Clewing, organizator i javës shkencore. Prandaj edhe ai ka ftuar dy referues që do ta cekin këtë temë: Patër Walter Happel, themeluesin e shkollës së Prizrenit dhe ministrin e arsimit, Enver Hoxhaj. “Në javën tonë ne jemi fokusuar në çështjet e arsimit, sepse të rinjtë e Kosovës janë rritur me një sistem shumë të vështirë arsimor, i cili nuk u stabilizua as në kohën e UNMIK-ut," argumenton Clewing. Në kuadër të fundjavës do të zhvillohet edhe një simpozium me temë “Politika dhe korrupsioni” ku do të referojnë 15 shkencëtarë nga Varshava, Prishtina, Londra e Roma, mes tyre edhe profesori nga Vjena, Oliver Jens Schmitt.

Instituti Juglindje ekziston që nga viti 1930, nga koha e Vajmarit dhe merret me studimin e historisë dhe të tashmes së Evropës Juglindore. Deri para dy vjetësh ai e kishte selinë në Mynih, tani është transferuar në një qendër të re shkencore në Regensburg, të cilën e financon landi i Bavarisë: “Synimi ynë është që Regensburgu të shndërrohet në qendrën kryesore të Gjermanisë për studimet e Evropës Juglindore,” thotë Clewing.

Autor: Anila Shuka

Redaktoi: Aida Cama


  • Data 22.04.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/Hbuq
  • Data 22.04.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/Hbuq