1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW
Live TV
Videot e fundit
Në fokus
EuropaGjermaniaBallkani Perëndimor

Irani pas zgjedhjeve - Arrestohen shumë protestues

14 Qershor 2009

Pas protestave kundër rizgjedhjes së presidentit Mahmud Ahmadinexhad, autoritetet iraniane janë duke proceduar kundër përfaqësuesve të kampit të refomuar politik.

https://p.dw.com/p/I93E
Protesta pas zgjedhjeve në Teheran.
Ithtarë të Musavit demonstruan në Teheran kundër shpalljes së Ahmadinexhadit si fitues të zgjedhjeve. Policia ushtroi dhunë ndaj demonstruesve.Fotografi: DW

Rreth qindra reformatorë janë arrestuar natën duke gdhirë dita e djelë, ndër ta edhe vëllai i ish presidentit, Mohamed Chatami. Kandidati reformator Mir Husein Musavi, i cili sipas rezultateve zyrtare i ka humbur zgjedhjet, nuk e njeh fitoren e Ahmadinexhadit për shkak të parregullsive gjatë votimeve. Mijëra ithtarë të tij, të shokuar fillimisht nga rezultati i zgjedhjeve, dolën të shtunën në mbrëmje nëpër rrugët e Teheranit, për të protestuar kundër rezultatit të zgjedhjeve. Gjatë këtyre protestave pati trazira, më të rëndat që prej zhvillimit të Revolucionit Islamik para 30 viteve. Shumë protestues u plagosën, disa demostrues u arrestuan. Sipas të dhënave zyrtare, Ahmadinexhadi u rizgjodh me 63 përqind të votave. Musavi morri gati 34 përqind. Dy kandidatët e tjerë nuk morrën as tre përqind të votave. Pjesëmarrja në zgjedhje duhet të ketë qenë 85 përqind.

Kandidati reformator Mir Husein Musavi.
Kandidati reformator Mir Husein Musavi, i cili sipas rezultateve zyrtare i ka humbur zgjedhjet, nuk e njeh fitoren e Ahmadinexhadit për shkak të parregullsive gjatë votimeve.Fotografi: AP

Opozitarët prisnin që zgjedhjet të kalonin në balotazh të premten e ardhshme, për shkak të garës kokë më kokë midis Ahmadinexhadit dhe Musavit. Por, televizioni shtetëror iranian njoftoi rizgjedhjen e Amhadinexhadit. Në një konferencë shtypi, Musavi nuk përdori fjalën "manipulim zgjedhjesh", por tha: "Në bazë të informacioneve të zyrave të mia në të gjitha pjesët e vendit, unë jam fituesi përfundimtar, madje me diferencë të madhe. Përveç kësaj, vëzhguesit tanë janë dëbuar nga shumë qendra votimesh. Zyrat tona të përgatitjes së zgjedhjeve janë sulmuar. Dhe zgjedhësve u janë shpërndarë pak vota."

Iraniane duke votuar.
Në zgjedhjet e mëparshme, para katër vitesh, pati mashtrime masive.Fotografi: AP

Në zgjedhjet e mëparshme, para katër vitesh, pati mashtrime masive. Prandaj si Musavi ashtu edhe ish presidenti Rafsanxhani, iu drejtuan të premten udhëheqësit shpirtëror të vendit, Ajatollah Ali Khamenei duke i kërkuar që të kujdeset për zgjedhje të ndershme. Idhtarët e Musavit, patën shpresuar në ndryshimin e politikës.

Çështja më e rëndësishme aktualisht është, si do ta shohin rezultatin e zgjedhjeve qindramijëra ithtarët e Musavit. Nuk mendohet që humbësi gjoja i zgjedhjeve, i cili përkrahet nga të dy ish presidentët, Khatami dhe Rafsanxhani të pranojë pa reaguar rezultatin e zgjedhjeve. Opozitarët flasin për puç të ushtruar nga Ahmadinexhad dhe idhtarët e tij ultrakonservatorë.

Autor : Ulrich Pick / Aida Cama

Redaktoi : Mimoza Cika Kelmendi