1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Intriga, kërcënime dhe korruptime tri disiplinat kryesore të politikës çeke

Çekia kërkon një president të ri: pasi asnjëri nga kandidatët nuk arriti të fitojë herën e parë shumicën e mjaftueshme të votave, për sot u caktua një datë e dytë për zgjedhje.

default

Pamje nga Praga

Këtë herë janë tre kandidatë që konkurojnë. Një luftë kundër njëri-tjetrit, ku pjesëmarrësit janë gati të paguajnë çdo çmim për të penguar kandidatin e palës kundërshtare.
Para së gjithash, partia konservatore në pushtet ODS dhe socialdemokratët e akuzojnë njëri-tjetrin se i vënë nën presion deputetët. ODS-ja mbështet kryetarin e saj të nderit, mbajtësin e postit, Vaclav Klaus. Socialdemokratët- së bashku me Të Gjelbrit - mbështesin sfiduesin liberal Jan Shvejnar. Por këta kandidatë kaluan që në datën e parë të zgjedhjeve në sfond për shkak të intrigave, kërcënimeve dhe korrupsionit, mendon shkencëtari i shkencave politike Jiri Pehe: "Për të gjitha partitë në lojë janë shumë gjëra, kjo shpjegon edhe emocionet e forta, kjo shpjegon këtë teatër politik. Kjo vetëkuptohet që nuk është normale dhe e dëmton shumë imazhin e skenës politike në Çeki."
Së fundi vëmendjen në teatrin politik të Pragës e tërhoqën komunistët opozitarë. Ata dolën papritur me një kandidate të vetën. Jana Boboshikova quhet gruaja, deputetja që nuk i përket asnjë partie në Parlamentin Evropian, e cila deri tani nuk njihej si e majtë, por si një nacionaliste djathtiste, e cila ngrihet me këmbëngulje kundër gjermanëve të Sudetëve.
Por njëkohësisht, komunistët i ofruan Jan Shvejnarit që ta tërheqin kandidaten e tyre, nëse liberali u bën atyre lëshime të caktuara- për shembull në temën delikate të mbrojtjes raketore amerikane në tokën çeke. Nuk të çudit fakti që shefi i partisë së socialdemokratëve, Jiri Parubek, e hodhi këtë menjëherë poshtë si zhurmë pa kuptim: "Ne jemi të gatshëm për negociata, por unë u bëj thirrje komunistëve që ta ndryshojnë qendrimin e tyre ndaj zgjedhjeve dhe të heqin dorë më në fund nga taktizimet dhe bishtnimet e vazhdueshme"
Me të vërtetë që komunistëve u pëlqen roli i caktuesit të presidentit. Deputetët e tyre, në dy raundet e para fundjavën e kaluar e mbështetën Shvejnarin me qëndrim miqësor ndaj Evropës, për të hequr dorë në raundin e tretë për arsye taktike nga mbështetja e tij. Gati sa votat do t'i kishin mjaftuar për t'u rizgjedhur në post kritikut të BE, presidentit aktual të Cekisë, Vaclav Klaus. Atij i mungoi një votë e vetme.
Kandidatja Boboshikova, sidoqoftë i rrit edhe më tej shanset e Klausit. Shefi i partisë i komunistëve sapo tha se sipas mendimit të tij është e sigurtë një shumicë votash për Klausin. Megjithatë, mbetet e paqartë nëse do të marrë fund sot teatri politik në Çeki.




  • Data 15.02.2008
  • Autor Hornung, Peter / Prag (HR)
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/D852
  • Data 15.02.2008
  • Autor Hornung, Peter / Prag (HR)
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/D852