1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Gauck: Në rast nevoje të përdoren edhe armët

Republika Federale e Gjermanisë ka qenë e tërhequr deri tani, dhe kjo ka bazën e vet tha Gauck në Deutschlandradio. Por në luftën për të drejtat e njeriut është e nevojshme të përdoren dhe armët.

Gjatë një vizite në Norvegji të presidentit gjerman Joachim Gauck kryeministrja norvegjeze Erna Solberg, tha se "Gjermania duhet ta normalizojë marrëdhënien e saj me botën". Presidenti gjerman Gauck, mendon se kjo thënie e kryeministres norvegjeze lidhet me faktin që Gjermania duhet të heqë dorë nga qëndrimi i tërhequr i dekadave të fundit dhe të marrë më tepër përgjegjësi ndërkombëtare, duke marrë edhe shembullin e Norvegjisë.

Norvegjia ka luajtur një rol aktiv në procesin e paqes në Guatemalë dhe është aktive për të drejtat e njeriut dhe paqen në shumë vende të largëta. Presidenti Gauck thotë se një kërkesë të tillë për një rol më aktiv të Gjermanisë ai e ka dëgjuar edhe nga aleatë të tjerë evropianë dhe tani duhet që Gjermania t'i përgjigjet seriozisht pyetjes, nëse ajo vepron në përputhje me rëndësinë së saj.

Angazhim ndërkombëtar më aktiv

Me angazhim ndërkombëtar të Gjermanisë presidenti gjerman përfytyron një pjesëmarrje aktive të Gjermanisë në lidhje anëtarët e Bashkimit Evropian apo të NATO-s për zgjidhjen e konflikteve në kontekst të gjerë. "Nëse qeveria gjermane është tani shumë aktive në konfliktin Ukrainë, atëherë ky angazhim është pikërisht në këtë kuptim." - thekson Gauck. Duke kujtuar të kaluarën presidenti gjerman thotë se "dikur gjermanët kanë qenë të përmbajtur sa i përket angazhimit ndërkombëtar në bazë të madhësisë apo rëndësisë ekonomike të Gjermanisë, dhe kjo kishte një bazë dhe shkaqet e veta. Por sot Gjermania është një demokraci solide dhe e besueshme, një shtet ku sundon ligji. Ajo qëndron në anën e të shtypurve. Ajo lufton për të drejtat e njeriut. Dhe në këtë luftë për të drejtat e njeriut ose për mbijetesën e njerëzve të pafajshëm, ndonjëherë është e nevojshme të përdoren gjithashtu edhe armët." - mendon presidenti gjerman.

Ndonjëherë i nevojshëm edhe përdorimi i armëve

"Ashtu sikurse ne kemi një forcë policore dhe jo vetëm gjyqtarë dhe mësues, ne kemi nevojë gjithashtu edhe për forca ndërkombëtare, që t'u presin rrugën kriminelëve ose despotëve që vrasin popujt e tyre ose pjesëtarët e një populli tjetër." Po ashtu sipas mendimit të presidentit forca të tilla janë të domosdoshme "si mjet i fundit, ndonjëherë bashkë me të tjera, për t'u mbrojtura nga ndonjë agresion i mundshëm." Për të gjitha këto presidenti gjerman është i mendimit se "përdorimi i mjeteve ushtarake si mjet i fundit nuk duhet të refuzohet që nga fillimi."