1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Eurozona dakord për ta ndihmuar sërish Greqinë

Nuk do të ketë 'Grexit', por Greqia duhet të miratojë deri të mërkurën reformat e kërkuara nga eurozona.

Udhëheqësit e eurozonës arritën pas një maratone bisedimesh një marrëveshje unanime për një plan të tretë ndihme financiare për Greqinë. Kryetari i BE-së Donald Tusk tha se udhëheqësit kanë rënë dakord "në parim" për negociata për shpëtimin e Greqisë "që me fjalë të tjera do të thotë mbështetje e vazhdueshme për Greqinë". "Nuk do të ketë 'Grexit'," tha kryetari i Komisionit Evropian, Jean-Claude Juncker, duke iu referuar frikës se Greqia mund të largohej nga eurozona. Greqia tani do të duhet të miratojë deri të mërkurën reformat e kërkuara nga eurozona.

Ristrukturimi i borxhit

Kryeministri grek Aleksis Tsipras u tha gazetarëve se Greqia ishte përballur me një "betejë të ashpër" gjatë së cilës fitoi ristrukturimin e borxhit, dhe i dërgoi një mesazh dinjiteti të gjithë Evropës. "Marrëveshja është e vështirë, por ne arritën të shmangim synimin për nxjerrjen e pasurive shtetërore jashtë vendit," tha ai. "Ne e shmangëm planin për një mbytje financiare dhe për rrënimin e sistemit bankar."

Jeroen Dijsselbloem, kreu i grupit të ministrave të Financave të eurozonës, tha se marrëveshja përfshin një fond prej 50 miliardë eurosh të bazuar në asetet e Greqisë, 25 miliardë prej të cilave do të përdoren për të rikapitalizuar bankat greke. Tani mbetet që parlamentet e një sërë shtetesh të eurozonës ta miratojnë programin e ri të ndihmave.

Rrugë e vështirë

"Rruga do të jetë e gjatë dhe duke gjykuar nga negociatat e tanishme, e vështirë," tha të hënën në mëngjes kancelarja gjermane Angela Merkel.

Udhëheqësit e eurozonës biseduan në Bruksel për rreth 17 orë dhe bisedime vazhduan madje edhe gjatë natës.

Gjatë natës, reporterët njoftuan se Greqia kishte ngulur këmbë në lidhje me rolin e propozuar në programin e ri të ndihmës për Fondin Monetar Ndërkombëtar (FMN), si dhe mbi fondin e bazuar në asetet greke.