1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

"Eshtë arritur më shumë nga ç'pritej prej nesh"

Bilanci afgan gjashtë muaj pas konferencës së Londrës

default

Ushtarë afganë në stërvitje ushtarake në Kabul

Në fund të janarit të këtij viti në Londër u mbajt një konferencë për të ardhmen e Afganistanit. Bashkësia ndërkombëtare kërkoi me forcë "afganizimin" e procesit të paqes, të ngecur në vend. Kështu për shembull përgjegjësia për sigurinë distrikt pas distrikti duhet t'u kalojë afganëve. Presidenti afgan Hamid Karsai premtoi nga ana e tij se do të marrë masa serioze kundër korrupsionit. Në konferencën pasuese në Kabul të martën (20.7.) bëhet një bilanc paraprak i arritjes së objektivave të miratuar në Londër.

Dossierbild 2 Jirga Karsai Afghanistan

Presidenti afgan Hamid Karsai

Gjendja në Afganistan është më kritike se kurrë. Rreth gjashtë muaj pas konferencës së Londrës nuk duket në horizont ndonjë kthesë pozitive. Përkundrazi: gjashtëmujori i kaluar ishte më i përgjakshmi që prej fillimit të misionit ISAF në vitin 2001. Ushtria afgane përballë këtyre zhvillimeve nuk e sheh veten të aftë të marrë në duar përgjegjësinë për sigurinë, ashtu siç synohej në fillim të vitit në Londër. Kjo nuk ka të bëjë edhe aq me superioritetin e talibanëve, se sa me mangësitë e shumta të forcave afgane, thotë gjeneral Zaher Azimi, zëdhënës i Ministrisë afgane të Mbrojtjes:

"Ne nuk mund të veprojmë të pavarur, pasi na mungon për shembull flota ajrore ushtarake. Edhe automjetet e blinduara deri tani na kanë munguar plotësisht."

General Zaher Azimi bei einer Pressekonferenz in Kabul

Zëdhënësi i Ministrisë afgane të Mbrojtjes, Gjeneral Zaher Azimi në një konferencë shtypi

Pak pas konferencës së Londrës për Afganistanin zëdhënësi i Ministrisë afgane të Mbrojtjes ishte shprehur plot shpresë. Por ndërkohë entuziasmi i tij është zbehur, mendon gjeneral Azimi. Ajo, që ka mbetur, është dëshira për përmirësim.

"Njerëzit në Afganistan shpresojnë që forcat afgane të sigurisë të mund të kujdesen për sigurinë e vendit të tyre. Por kjo duhet të ndodhë, kur ne të jemi të aftë për këtë."

Ministri afgan i Financave Omar Zakhelwal ushtron ndërkaq kritikë të hapur ndaj partnerëve të vendit të tij: Ata duhet t'i përmbahen marrëveshjeve të arritura. Qeveria afgane nga ana e saj i ka përmbushur të gjitha detyrat e ngarkuara në konferencën e Londrës, thotë Zakhelwal:

"Çdo ministri, çdo autoritet ka hartuar krahas një strategjie për të ardhmen edhe një koncept efektiv për luftimin e korrupsionit. Kështu ne kemi arritur shumë më tepër nga sa pritej prej nesh."

Aufbau in Afghanistan

Studentë afganë në përurimin e një konvikti studentësh

Ministri afgan i Financave shpreson të ketë të drejtë të përdorë së shpejti 50% të fondeve të ndihmës ashtu siç është premtuar në Londër. Deri tani qeveria afgane ka marrë vetëm 20% të këtyre fondeve. Por përballë shtrirjes së gjerë të korrupsionit në vend, shumë vende donatore janë skeptike. Ato i druhen keqpërdorimit dhe abuzimit me paratë e ndihmës.

Kritikët akuzojnë presidentin Karsai për mungesë koncepti

Megjithë deklaratat e qeverisë për përparime në luftën kundër korrupsionit, kritikët e qeverisë afgane e akuzojnë presidentin Karsai se nuk ka asnjë koncept për zgjidhjen e problemeve madhore të vendit, pra edhe për shpërdorimin e parave të ndihmës.

Analistët mendojnë se bashkëpunimi i pamjaftueshëm dhe hedhja reciproke e fajit mes Kabulit dhe bashkësisë ndërkombëtare janë shkaqet kryesore për mosarritjen e objektivave të konferencës së Londrës.

Autor: Ratbil Shamel/Eiana Xhani

Redaktoi: Angjelina Verbica

  • Data 20.07.2010
  • Autor Angelina Verbica
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/OQEW
  • Data 20.07.2010
  • Autor Angelina Verbica
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/OQEW