1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Cilat janë arsyet që në Shqipëri ka një nivel kaq të ulët të aksesit të gruas në politikë?

Ligji zgjedhor në Shqipëri parashikon që një ndër tre kandidatë të jetë femër. Por kjo mbetet në letër. Në kandidaturat e PD dhe PS për zgjedhjet lokale të 8 majit ka vetëm 13 gra përballë 755 burrave.

default

Jeta Seitaj është një nga 13 gratë, që po konkurron për t'u rizgjedhur kryetare e një minibashkie në Tiranë, e kandiduar nga PS. Kur e pyes pse ka kaq pak gra edhe nga PD, që po kandidojnë për t'u zgjedhur në organet e pushtetit lokal, ajo thotë: “Ka një klimë shumë të ashpër politike në këto zgjedhje, prandaj ka rënie të kandidaturave të grave për t'u zgjedhur. Politika është shumë e ashpër, ka një super politizim të zgjedhjeve vendore, sikur të jenë zgjedhje politike dhe kjo ka bërë që shumë gra të mos pranojnë të kandidojnë, të tërhiqen në momentin e fundit: ashpërsimi i klimës politike është ekstrem, ka rrahje, plagosje. Dhe gratë, që nga natyra e zbusin politikën, nuk e gjejnë veten në këtë politikë kaq të ashpër.” thotë Jeta Seitaj.

Albanien Frauenquote

Jeta Seitaj

Dëshira Subashi, një tjetër grua, që është ne pozicion drejtues, Nën/kryetare e Komisionit Qëndror të zgjedhjeve gjen të njëjtën arësye për numrin e pakët të grave, që po kandidojnë për organet drejtuese të pushtetit lokal, që do të dalin nga zgjedhjet lokale të 8 Majit. “Klima e ashpër politike prej dy vitesh ka sjellë një situatë të tillë, kur në fushatë ndodh edhe që ka dhunë dhe duhet të përballesh fizikisht. Po shikohen tensione politike. Zbutja e klimës politike do të sillte edhe më shumë kandidatura të grave. Gruaja mund të përballet në fushatë me nje kandidat normal, intelektual, që nuk ushtron ndaj saj dhunë emocionale, apo psikologjike.”

OSBE-projekte, që rrisin besimin dhe vendosmërinë e gruas kandidate

Por një projekt i OSBE-së “Gratë në qeverisje” po kontribuon të promovojë pjesëmarrjen e gruas në politikë duke rritur sigurinë, besimin dhe vendosmërine e tyre për të pranuar të kandidojnë. Eugen Wollforth, Ambasadori i Pranisë së OSBE-së në Shqipëri, thotë për programin shqip të DW: “Projekti “Gratë në qeverisje” ka ofruar treinim për 150 kandidate të mundshme nga të gjitha partitë politike. Projekti ndihmon në rritjen e pjesëmarrjes së grave në politikë dhe i bën ato më të sigurta dhe bindëse në daljet e tyre në publik, si kandidate. Projekti vazhdon. Në shtator do të organizojmë një shkollë verore për gratë e zgjedhura, për t' u promovuar në politikë. Po shqyrtojmë opsionet e mundshme për të siguruar fonde për një fazë të dytë të këtij projekti shumë të rëndësishëm.”

Për shkeljen e ligjit-dënime shumë të lehta për partitë

Albanien Frauenquote OSZE

Eugen Wollforth, Ambasadori i Pranisë së OSBE-së në Shqipëri

Klima e ashpër politike nuk është e vetmja arsye. Shoqëria shqiptare vazhdon të jetë një shoqëri maskiliste, e dominuart nga burrat. Ndryshimin e saj do ta sillte në rradhë të parë respektimi i ligjeve, që mbështesin barazinë gjinore. Në rastin e përfaqësimit kaq të ulët të gruas në drejtimin e pushtetit lokal nuk është zbatuar Kodi Elektoral, që parashikon kuotën prej 30% të pjesëmarrjes së gruas në kandidaturat e partive politike.

Jeta Seitaj thotë se nëse do të zbatohej ligji përfaqësimi i gruas në politike do t'i afrohej kësaj kuote. “Jam për zbatimin e ligjit kudo, jo vetëm për barazinë gjinore. Zbatimi i tij do të sillte ndryshimin”, thotë ajo

Por ka edhe një dukuri tjetër. Ligji jo vetëm që nuk zbatohet, por për moszbatuesit e tij ndëshkimet janë tepër të lehta, pothuajse të papërfillshme. Kështu ligji parashikon që subjektet politike, që nuk zbatojne kuotën prej 30% të pjesëmarrjes së gruas si kandidate në zgjedhjet parlamentare apo lokale, të dënohen me një gjobë që shkon deri në 2500 euro, shifër që nuk i rëndon dy partitë e mëdha, PD-PS, që dominojnë skenën e politikës në Shqipëri.

Autor: Ani Ruci

Redaktoi: Angjelina Verbica

  • Data 16.04.2011
  • Fjalët kyç data
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/10tWX
  • Data 16.04.2011
  • Fjalët kyç data
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/10tWX