1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Bundestagu gjerman debaton për politikën evropiane ndaj refugjatëve

Për herë të parë parë pas katastrofës së Lampeduzës Bundestagu gjerman debatoi për politikën evropiane ndaj refugjatëve.

Bundestagu gjerman debatoi të premten (17.01) për politikën evropiane ndaj refugjatëve. Në debate u vu re që edhe deputetët konservatorë ishin dakord me kërkesën e partisë E Majta për të diskutuar rreth politikës evropiane ndaj refugjatëve. Me sa duket pamjet e 3 tetorit 2013, kur në brigjet e ishullit italian Lampedusa u mbyt një anije me refugjatë nga Somalia gjë që u shkaktoi vdekjen më shumë se 100 vetëve, kanë tronditur jo vetëm teleshikuesit në gjithë Evropën, por i bashkojnë edhe politikanët e kampeve të ndryshme. Papa kërkoi asokohe nga evropianët më shumë humanizëm. Bundestagu gjerman debatoi për herë të parë që prej kësaj katastrofe për politikën evropiane ndaj refugjatëve.

Tone mirëkuptimi

Partia E Majta u hodh në sulm kundër politikës së Bashkimit Evropian dhe të qeverisë gjermane. "Të paskrupullt, çnjerëzore dhe të turpshme", e quajti deputetja Ulla Jelpke politikën ndaj refugjatëve. Por në vend të zemërimit për deklarata të tilla në parlament u dëgjua e shumta ndonjë paralajmërim i butë si ai i deputetit të CDU-së Frank Heinrich, që kërkesa të tilla të mos formulohen në formë polemike, që mund të interpretohen si lojë politike populiste. Kolegu i tij Stephan Mayer e siguroi partinë e Majta se nëse është e nevojshme që të merret vendim për t'i dërguar një apel parlamentit italian për të tërhequr ligjet kufizuese të epokës Berluskonit, ai do të votonte pro kësaj kërkese.

Sistemi i Dublinit nuk mund të justifikohet më

Megjithatë partitë gjermane janë shumë larg në qëndrimet e tyre në lidhje me politikën ndaj refugjatëve. Partia E Majta bën thirrje për t'i dhënë fund misionit kufitar Frontex në Mesdhe. Refugjatët duhet të kenë të drejtë të zgjedhin në kuadër të BE-së se ku duan ta bëjnë kërkesën për azil. Deri tani ata duhet ta bëjnë këtë kërkesë në vendin ku hyjnë për herë të parë në territorin e BE-së. Kjo është vendosur në marrëveshjet e Dublinit për politikën e përbashkët ndaj refugjatëve. "Sistemi i Dublinit nuk mund të justifikohet më", thotë deputetja Louise Amtsberg nga Partia e Gjelbër. Edhe SPD-ja dëshiron t'i ndryshojë marrëveshjet dhe angazhohet për një kuotë, sipas së cilës refugjatët mund të shpërndahen proporcionalisht mes vendeve të BE-së.

Një model i tillë do t'i lehtësonte vende si Italia dhe Greqia, ku hyjnë shumica e refugjatëve, dhe Gjermania nuk do të përballet me një barrë shtesë, tha deputeti socialdemokrat Rüdiger Veit. Ai kritikoi se reforma e sistemit të Dublinit qe bllokuar në të kaluarën kryesisht nga Gjermania dhe u bëri thirrje të gjithë anëtarëve të qeverisë për t'u angazhuar për reformimin.

Luftë bandave të trafikantëve

"Asnjë vend në Bashkimin Evropian nuk pranon më shumë refugjatë sa Republika Federale e Gjermanisë", e justifikoi politikën e Gjermanisë deputeti i CSU-së Stephan Mayer. CDU dhe CSU nuk duan ndryshime në marrëveshjen e Dublinit dhe mendojnë se Italia dhe Greqia duhet të përmirësojnë kushtet në kampet e refugjatëve, sepse "në një vend modern perëndimor ato nuk janë të denja për të strehuar aty refugjatë", kritikoi ai. Ai kërkoi nga BE-ja që të rrisë përpjekjet në luftën kundër kontrabandistëve dhe trafikantëve, sepse ata janë përgjegjësit e vërtetë për vdekjen e njerëzve në Lampedusa.

Kjo është edhe linja zyrtare e qeverisë gjermane, e cila deklaroi se në politikën evropiane për punët e brendshme dhe refugjatët nuk do të ketë një herë për një herë ndonjë katalog për nisma të reja ligjore.