1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Berlini krah Francës: Merkel pjesë e marshimit të Parisit

Kancelarja Merkel ka premtuar luftë të përbashkët për vlerat europiane. Duhet mbrojtur dinjiteti i njeriut pavarësisht nga besimi, ka thënë Merkel, që të dielën merr pjesë në marshimin përkujtimor të viktimave në Paris.

"Aty ku sulmohen vlerat, duhet të ngremë zërin", ka bërë të ditur kancelarja gjermane Angela Merkel në kuadër të një konference të CDU-së në Hamburg. Është një sinjal i rëndësishëm për miqësinë gjermano-franceze "që në këto momente të qëndrojmë bashkë". Njerëzit në Gjermani i qëndrojnë krah Francës, kur bëhet fjalë për të mbrojtur vlera të tilla si liria e shtypit apo liria e fesë, ka thënë Merkel.

"Vlerat mbrohen"

Sipas kancelares gjermane që tani bëhet e qartë se viti 2015 do të jetë një sfidë për mbrojtjen e këtyre vlerave që janë të rëndësishme për europianët. "Kur kjo vihet në rrezik si në sulmin barbar kundër karikaturistëve, atëherë duhet të tregojmë unitet", theksoi Merkel.

Kancelarja bëri të qartë se së bashku me ministrin e Brendshëm gjerman, Thomas de Maiziere do të jetë pjesë e marshimit përkujtimor të dielën në Paris. Ky marshim organizohet për të kujtuar viktimat e sulmit terrorist kundër revistës satirike "Charli Hebdo" e viktimat e tjera të sulmeve të ditëve të fundit në Paris. Edhe krerë të tjerë të shteteve europiane kanë konfirmuar pjesëmarrjen e tyre si kryeministri britanik, David Cameron, kryeministri spanjoll, Mariano Rajoy dhe kryeministri italian, Matteo Renzi. Renzi shkroi në twitter: "JeSuis Charlie" Nuk do ta lejojmë frikën të ndryshojë Europën." Edhe presidenti i Shteteve të Bashkuara, Barack Obama i siguroi qeverisë në Paris solidaritetin e vendit të tij. "Ne luftojmë së bashku me ju për vlerat që ndajmë", theksoi presidenti amerikan në një miting në shtetin amerikan Tenesse.