1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

BE ashpërson sanksionet kundër Sirisë

28 Shkurt 2012

Në agjendën e këshillit të ministrave të jashtëm të BE-së ishin dje Siria dhe Irani. Në rastin e Sirisë synohej rritja e trysnisë mbi regjimin e Assadit. Embargoja tregtare mendohet ta prekë qeverinë siriane rëndë.

https://p.dw.com/p/14BIM
Catherine Ashton bën Rusinë dhe Kinën përgjegjëse për gjakderdhjen në Siri
Catherine Ashton bën Rusinë dhe Kinën përgjegjëse për gjakderdhjen në SiriFotografi: dapd

BE-ja po e vë nën trysni qeverinë siriane, mirëpo (në rast të ndryshimeve demokratike) ajo hap edhe perspektivën për shtysa. Nga njëra anë BE-ja i ashpërsoi edhe një herë sanksionet: personave të tjerë drejtues nga rrethi i presidentit Bashar al Assad u ndalohet hyrja, llogaritë e tyre bankare bllokohen. Edhe gjithë pasuria e bankës qendrore siriane në BE po ngrihet. Blerja e arit, e metaleve të çmuara dhe e e diamanteve nga Siria është e ndaluar sikurse qarkullimi ajror i mallrave midis Evropës dhe Sirisë.

Ministri i jashtëm austriak Michael Spindelegger, e vlerëson pozitivisht vendimin. "Kur ne ngrijmë paratë e bankës qendrore, atëherë kjo ka pasoja, sepse natyrisht që preket regjimi dhe kësisoj duhet të kërkojë tani rrugë të tjera, gjë që nuk nuk ka për të qenë aq e thjeshtë."

BE-ja i ashpërsoi edhe një herë sanksionet
BE-ja i ashpërsoi edhe një herë sanksionetFotografi: dapd

Mirëpo, në rast se nis një ndryshim politik, BE-ja planifikon të ndihmojë financiarisht dhe me marrëdhënie ekonomiko-tregtare favorizuese. Kushti: Ky ndryshim nuk lejohet të ketë të bëjë më me presidentin Bashar al Assad.

Dhe për referendumin e të dielës së kaluar (26.02.) të Assadit mbi kushtetutën e re ministrat e jashtëm të BE-së patën vetëm kritikë therëse: Për ta ajo nuk shkon aq larg sa duhet. Në fakt, hiqet monopoli i pushtetit i Partisë qeverisëse Baath, mirëpo presidentit i mbeten fuqi të plota. Ministri gjerman Guido Westerwelle bëri fjalë për një "farsë", homologu i tij austriak Spindelegger për "përçmim". "Nuk mund të thuhet nga njëra anë: 'Ju lejoheni tani të gjithë të bashkëvendosni', dhe nga ana tjetër përditë ka të vdekur, të cilët vriten pa diskriminim me armë zjarri në demonstrata."

Demostrata kundër Bashar Al-Assad-it në Idlib
Demostrata kundër Bashar Al-Assad-it në IdlibFotografi: dapd

Në përpjekjet për zgjidhje BE-ja vazhdon të investojë para së gjithash te Kombet e Bashkuara, megjithëse Rusia dhe Kina i pengojnë prej muajsh rezolutat për Sirinë. Prandaj përfaqësuesja e BE-së për politikën e jashtme Catherine Ashton i bëri këto dy vende tërthorazi përgjegjëse për gjakderdhjen në Siri. "Anëtarët e Këshillit të Sigurimit duhet të mbajnë përgjegjësinë për këtë tragjedi të tmerrshme. Dhe për sa kohë nuk ka unitet, lëshohet një sinjal i gabuar për Assadin. Ne duhet të qëndrojmë të bashkuar!"

Autor: Christoph Hasselbach/ Elert Ajazaj

Redaktoi: Aida Cama