1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Austria do të zgjasë afatin e kontrolleve në kufi

Austria duke nisur nga mesi i Muajit maj do të shtyjë pa afat rregulloren për kontrollet në kufi. Në kulmin e krizës së refugjatëve në vitin 2015 në zonën Shengen u rivendosën përkohësisht kontrollet kufitare.

"Për aq kohë sa kufijtë e jashtëm nuk mund të mbrohen si duhet, ne do të vazhdojmë të marrim masa në nivel kombëtar", i tha ministri i Brendshëm autriak Wolfgang Sobotka i partisë konservatore ÖVP, gazetës gjermane "Die Welt" (26.04.2017). "Në frymën e rendit publik dhe të sigurisë së brendshme unë thjesht duhet ta di se kush hyn në vendin tonë." Ministri u shpreh optimist, që Brukseli do të japë miratimin e nevojshëm. Ai nisur nga stadi aktual parashikon, që Komisioni Europian do të rekomandojë shtyrjen e afatit të kontrolleve kufitare.

Sipas gazetës «Die Welt» javën e ardhshme Komisioni do të komunikojë vendimin për shtyrjen sërish të afatit të kontrolleve në kufi në kuadër të nenit 29 të Kodeksit Kufitar të Shengenit.

Në fillim të shkurtit Këshilli i Ministrave të BE-së, pas një rekomandimi përkatës të Komisionit Europian, i lejoi Gjermanisë dhe katër vendeve të tjera anëtare të BE-së, që të rivendosin kontrollet kufitare për tre muaj deri në mes të majit. Por këto shtete duhet të bien në ujdi me vendet e tyre fqinjë në mënyrë që  kontrollet të jenë të kufizuara brenda një mase të nevojshme.

Faktikisht në zonën Shengen mbizotëron liria e lëvizjes dhe rregullat përjashtimore mund të vendosen vetëm për një afat të kufizuar. Gjermania, Austria, Danimarka, Suedia dhe Norvegjia ndërkohë që pas krizës së refugjatëve në vitin 2015 kontrollojnë sërish, se kush hyn në vend.