1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Portret

Armët e suksesit: prindërit, familja dhe disiplina

Në Qendrën gjermano-amerikane Marshall punon edhe pedagogja shqiptare Valbona Zeneli, për të cilën ajo ndjen një përgjegjësi të madhe, por edhe privilegj. Megjithatë rruga për të arritur deri këtu nuk ka qenë e lehtë.

Emrin e George Catlett Marshall (1880-1959) e njohin pothuajse të gjithë në botë, jo vetëm si një gjeneral të ushtrisë amerikane dhe burrë shtetitë SHBA-së. Marshall u bë i njohur veçanërisht për të ashtuquajturën „Plani Marshall“ në 1947 për rimëkëmbjen e Evropës së shkatërruar nga Lufta e Dytë Botërore, për të cilën ai u nderua edhe me çmimin Nobel për paqe në vitin 1953 dhe më pas në vitin 1959 me çmimin e madh gjerman të Karlit.

Në nderim të emrit të tij, në vitin 1993 në Garmish Partenkirchen të Gjermanisë, në landin e Bavarisë u themelua një qendër më emrin e tij: George C. Marshall European Center for Security Studies. Kjo qendër është një institucion gjermano-amerikan për studime në fushën e mbrojtjes dhe të sigurisë, e veçanërisht në përmirësimin e institucioneve demokratike dhe të marrëdhënieve në fushën e mbrojtjes, e udhëhequr nga trashëgimia dhe idealet e Planit Marshall.

George C. Marshall, emrin e të cilit e mban sot Qendra Marshall në Gjermani

George C. Marshall, emrin e të cilit e mban sot Qendra Marshall në Gjermani

Në Qendrën Marshall janë specializuar më tepër se 9.000 kursantë nga 137 vende të botës dhe me tepër se 20.000 pjesëmarrës në aktivitete të ndryshme. Mbi 300 syresh shërbejnë sot si presidentë, ministra, parlamentarë dhe zyrtarë të tjerë të lartë në vendet e tyre. Në mesin e kursantëve ka qenë dhe presidentja e Kosovës, Atifete Jahjaga. Por ajo që e bën për ne edhe më interesante këtë qendër është prania për herë të parë e një pedagogeje shqiptare nga Tirana, Dr. Valbona Zeneli.

Rruga e saj për të arritur deri këtu ka qenë jo e lehtë. E lindur dhe e rritur në Tiranë, Valbona përfundon studimet për ekonomi dhe biznes në Universitetin e Bolonjës në 2001 me rezultate të shkëlqyera. E udhëhequr nga motoja se kualifikimi i vazhdueshëm nuk është opcion, por domosdoshmëri, ajo do të zhvillojë një sërë specializimesh në Berlin dhe Mynih, veçanërisht në fushën e ekonomisë dhe menaxhimit dhe pas gjithë kësaj përvoje, Valbona preferon të kthehet në Tiranë me synimin për të vënë në jetë ato që kishte studiuar.

Valbona Zeneli nga Tirana në auditorin e Qendrës Marshall

Valbona Zeneli nga Tirana në auditorin e Qendrës Marshall

"Për këtë nuk jam penduar aspak. Pak pas kthimit tim në Tiranë fillova punë në Ministrinë e Ekonomisë, një detyrë me një hapësirë të madhe, me një problematikë të gjerë, veçanërisht në marrëdhënie me patnerët ndërkombëtarë, që më dha bazat shumë të rëndësishme të njohjes së funksionimit të administratës publike." - kujton Valbona. Më pas një përvojë e veçantë profesionale, por edhe politike do të ishte puna në kabinetin e kryeministrit. Krahas kësaj ka qenë edhe pedagoge në disa universitete të Tiranës, deri se fundmi në UET. Valbona zotëron mjaft mirë disa gjuhë të huaja dhe për këtë u është mirënjohëse prindërve: "Armët e suksesit tim janë prindërit, familja. Rregulli tepër strikt, disiplina shumë e fortë janë kyçi i gjithçkaje që kam arritur sot“.

Këtë e tregon edhe fakti që megjithse nënë me një djalë sot 6-vjeç, Valbona nuk e ka të vështirë t'i përballojë sfidat. "Një njeri mund të quhet i suksesshëm vetëm kur ka çdo gjë të balancuar dhe në ekuilibër, pra të qenit nënë, grua, bashkëshorte, mike. Kjo nuk do të thotë të jesh e përkryer në të gjitha, por mundohem që t'i bëj detyrat në çdo drejtim. Kur ende i kisha djalin shumë të vogël kam bërë edhe doktoraturën. Pra asgjë nuk është e lehtë për askënd, por as e pamundur. Dhe si unë ka shumë vajza dhe gra që ia kanë arritur.“ thotë Valbona.

Presidentja e Kosovës, Atifete Jahjaga, ish kursante në Qendrën Marshall

Presidentja e Kosovës, Atifete Jahjaga, ish kursante në Qendrën Marshall

Bisedon me pedagogen e re e nuk mund të mos konstatosh menjëherë jo vetëm thjeshtësinë por edhe të folurën e saktë e të kulturuar. Këtë e përforcon edhe një formim kulturor, akadamik por edhe politik solid. Në bashkëbisedim me të kupton se është mjaft e informuar për çështjet e sigurisë, të zhvillimeve rajonale, etj. Vetëm një vit në Marshall Center, dhe ajo ka marrë pjesë në mjaft konferenca ndërkombëtare për çështje të politikave të sigurisë ku ka referuar me kompetencë akademike.

Në këtë rrugë të gjatë pune dhe njëkohësisht specializimesh pasuniversitare si në Universitetin Georgetown në Uashington, Valbona në vitin 2003 erdhi për specializim edhe në Qendrën George C.Marshall, të cilën e sheh si një shans të madh për t'u rikthyer tashmë në vitin 2011 si pedagoge e kësaj qendre të njohur në Gjermani. “Eshtë fat, privilegj dhe përgjegjësi e madhe që jam këtu, pasi nuk përfaqësoj vetëm Valbonën por edhe vendin tim“, thotë ajo me krenari.

Sipas Valbonës përftimet në këtë institucion janë të jashtëzakonshme, jo vetëm nga pikpamja akademike, kulturore, didaktike, por edhe në aspektin praktik, politik të zhvillimeve e ngjarjeve. "Kam përfituar shumë për konceptet e sigurisë nga krimi i organizuar, nga korrupsioni e terrorizmi“, vë në pah ajo në bisedë me DW.

Ajo eshte autore e mjaft artikujve dhe analizave ne faqet e shtypit shqiptar e ndërkombëtar.

Ka vite që në këtë qendër vijnë edhe kursantë nga Shqipëria dhe Kosova. Deri tani janë diplomuar rreth 200 kursantë shqiptarë. "Për Shqipërinë dhe Kosovën ndihet një interes i madh nga kolegët këtu në Qendrën Marshall, veçanërisht për Shqipërinë si vend anëtar i NATO-s dhe që aspiron për në BE. Shqipëria shihet si faktor stabiliteti në rajon dhe kjo është shumë e rëndësishme për ta forcuar këtë cilësi“, thekson Valbona Zeneli.