1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

Aleancë mbrojtëse, polic botëror, apo luftëtare kundër urisë?

Detyrat e Sekretarit të ri të Përgjithshëm të NATO-s për katër vitet e ardhshme janë të mëdha: reformimi i NATO-s, përfundimi me sukses i angazhimit në Afganistan dhe vendosja e kontakteve me botën myslimane.

Anders Fogh Rasmussen gjatë një konference për shtyp (03.08.09)

Anders Fogh Rasmussen gjatë një konference për shtyp (03.08.09)

Pak javë më parë, një ditë e vetme e bëri shumë të qartë se ku ndodhet aktualisht NATO-ja: në mes të kërkimit të kuptimit për veten. Aleanca mbrojtëse dërgoi një ftesë për një konferencë në Bruksel. Në listën e të ftuarve: ish-ministrja e Jashtme e SHBA, Medlën Ollbrajt, kryetari i koncernit britanik të sigurimeve Lloyds, profesorë, përfaqësues të organizatave humanitare dhe mediet.

Tema: detyrat e NATO-s në të ardhmen. Aleancë mbrojtëse, polic botëror, apo luftëtare kundër urisë, siç e kërkoi drejtoresha e Programit Botëror të Ushqimit të OKB-së, Zhozet Shiran NATO-ja dëshiron të pajiset me një koncept të ri strategjik, këtë e vendosën shtetet anëtare.

Dialogun e reformimit duhet ta shtyjë tani përpara Sekretari i ri i Përgjithshëm, Anders Fog Rasmusen, thotë Giles Merrit nga Instituti i Brukselit për Sigurinë dhe Mbrojtjen: "NATO-ja duhet t'i rikonceptojë tërësisht strukturat. NATO-ja duhet të përgatitet për luftëra, në të cilat kundërshtari ndërmerr atentate dhe në të cilat ai e kundërshton shoqërinë civile. Ky ndryshim nuk është kryer ende, ne vazhdojmë të mbështetemi te tanket dhe te avionët reaktivë."

NATO-ja mes detyrave civile dhe ushtarake

Isabelle Voßwinkel gjatë një seance trainimi të policëve afganë

Isabelle Voßwinkel gjatë një seance trainimi të policëve afganë

Prej kësaj rezultojnë vështirësi, siç tregon lufta në Afganistan. Pyetja tjetër që shtrohet është nëse NATO-ja duhet të ngrejë shkolla dhe të ndërtojë administratën dhe nëse është në gjendje për këtë. "Kjo nuk është detyra e saj. Në këtë kuadër ajo nuk është e mbingarkuar, por instrumenti i gabuar për këtë çështje." - mendon Johanes Varvik, profesor për shkencat politike.

Por Sekretari i ri i Përgjithshëm i NATO-s jo vetëm duhet të çojë përpara debatin për të ardhmen e aleancës ushtarake. Detyra kryesore do të jetë angazhimi në Afganistan - suksesi ose dështimi i tij. "Besoj se ne duhet të largohemi prej angazhimit thjesht ushtarak. Megjithatë, çështja mbetet se si mund të ndërtojmë një kulturë politike dhe një shoqëri civile, e cila të jetë stabile. Në këtë sektor evropianët duhet të angazhohen edhe më fort, këtu ne kemi më shumë përvojë, për shkak të misioneve të BE."

Javët e fundit, amerikanët ndërruan komandantin e trupës ndërkombëtare në Afganistan. Në krye të trupave tani është gjenerali MkKristël (McCrystal), i cili synon ta pakësojë numrin e sulmeve ajrore dhe të viktimave civile në Afganistan. Njëkohësisht SHBA do të përforcojnë trupat e këmbësorisë.

Perceptimi nga bota arabe detyrë e madhe për Rasmusenin

Na falni, nuk shesim prodhime daneze

Bojkotimi i prodhimeve daneze në vendet arabe pas botimit të karikaturave të Muhametit (janar 2006)

Detyra e tretë e madhe për Rasmusenin duhet të jetë mënyra e perceptimit të tij në botën myslimane. Si kryeministër danez ai mbrojti atë që kritikuan shumë myslimanë: karikaturat e profetit Muhamet në gazetat daneze. Rasmuseni e di shumë mirë, se NATO-ja është në radhën e parë dhe se ajo duhet të arrijë kompromis në paqe me botën arabe dhe fenë islame, për ta pakësuar dhunën.

Autor: Christoph Prössl/Auron Dodi
Redaktor: Pandeli Pani

  • Data 03.08.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/J2gM
  • Data 03.08.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/J2gM