C. Гайдукевіч абвінаваціў супернікаў у выкарыстанні свайго імя для збору подпісаў

Патэнцыйны кандыдат на пасаду прэзыдэнта Сяргей Гайдукевіч выказаў абвінавачанне на адрас ініцыятыўных групаў сваіх канкурэнтаў. Ён сцвярджае, што тыя падманваюць выбаршчыкаў, збіраючы подпісы грамадзянаў ад ягонага імя. У іншых ініцыятыўных групах мяркуюць, што спадар Гайдукевіч перабольшвае сваю вагу і папулярнасьць сярод выбаршчыкаў. Сяргей Гайдукевіч заявіў, што рыхтуе сваю першую скаргу ў Цэнтравыбаркам. Яна звязана з тым, што, паводле ягоных словаў, адначасова ў Гарадзенскай, Віцебскай і Гомельскай абласцях прадстаўнікі ягонай каманды зафіксавалі факты, калі зборшчыкі подпісаў за іншых прэтэндэнтаў казалі грамадзянам, што ўваходзяць у ініцыятыўную групу Гайдукевіча. Такім чынам, яны падманам нібыта атрымлівалі подпісы, якія потым афармляліся на некага іншага.