1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Беларусь

У Мінску пачаўся судовы працэс над Аляксандрам Казуліным

На адкрыццё працэсу прышлі сотні людзей, каб паказаць сваю салідарнасць са змешчаным за краты з 25 сакавіка палітыкам. Аднак у будынак суду змаглі патрапіць толькі адзінкі.

Сёння ў судзе Маскоўскага раёна Мінска пачаўся працэс над экс-кандыдатам у прэзідэнты Беларусі Аляксандрам Казуліным, якога абвінавачваюць у хуліганстве, а таксама ў арганізацыі і падрыхтоўцы дзеянняў, што груба парушаюць грамадскі парадак. На адкрыццё працэсу прышлі сотні людзей, каб паказаць сваю салідарнасць са змешчаным за краты з 25 сакавіка палітыкам. Аднак у будынак суду змаглі патрапіць толькі адзінкі. Нават кіраўнікоў дыпламатычных місій краін Еўрасаюза вартаўнікі парадку спачатку не жадалі пускаць у раённы Палац правасуддзя.

Ад самай раніцы ля будынку Маскоўскага райсуду хваляваўся натоўп, а ахова імкнулася ачысціць прылеглую тэрыторыю.

АМАП:

"Адыходзім назад ад дзвярэй, спускаемся з ганка!.. - Вы пускаць будзеце або не? Грамадзяне, адыдзіце..."

У натоўпе апынуліся заціснутымі і замежныя дыпламаты. Як пазней паведаміў журналістам пасол Германіі Марцін Хекер, яму прыйшлося паскардзіцца на перашкоду ў беларускае знешнепалітычнае ведамства:

"Гэта незвычайна! Гэта, я думаю, для амбасадараў не так часта бывае. Мы інфармавалі МЗС, мы паслалі ноту і яны падрыхтавалі, можа быць, прыём для нас… Я патэлефанаваў у МЗС, я сказаў, што ў нас маленькія перашкоды існуюць, і я гаварыў з кіраўніком аддзела Еўропы".

Толькі пасля гэтага дыпламатаў прапусцілі. Пасольства ФРГ, якая зараз здзяйсняе функцыі мясцовага старшынства Еўрапейскага саюза, сёння распаўсюдзіла заяву: "Прадстаўніцтвы краін ЕС будуць назіраць за ходам судовага працэсу над Аляксандрам Казуліным, а таксама за іншымі судовымі працэсамі і рабіць справаздачы аб гэтым сваім урадам", - гаворыцца ў дакуменце.

"Кіраўнікі дыпламатычных місій краін Еўрасаюза, прадстаўленых у Мінску, прысутнічалі сёння на адкрыцці судовага працэсу над Аляксандрам Козулиным, - адзначаецца ў паведамленні. - Еўрапейскі Саюз па-ранейшаму зацікаўлены ў тым, каб Беларусь выконвала свае міжнародныя абавязальніцтвы, у тым ліку, у галіне правоў чалавека і асноўных палітычных свабодаў, а таксама не ізалявалі сябе ў Еўропе".

Прадстаўнікі прэсы не змаглі патрапіць на пачатак судовага працэсу, у сувязі з чым Марцін Хекер адзначыў, што гэта дрэнна, і ён не ўпэўнены, што гэта адпавядае міжнародным стандартам. Пасол Хекер распавёў, як прафесар Казулін паводзіў сябе на пачатку працэсу:

"Вельмі важна, што мы можам назіраць гэта працэс. Гэта добра, што нас дапусцілі. Я Казуліна бачыў, ён нас прывітаў, бо мы ўсё ведаем яго, таму што гэта задача амбасадараў пазнаёміцца з кандыдатамі і, вядома, мы часта гаварылі з ім, ён быў у Германіі, ён сустрэўся з маім кіраўніцтвам”.

Падтрымаць Казуліна прыйшоў і адзін з лідэраў беларускай апазіцыі Аляксандр Мілінкевіч, але яго ў будынак суду не прапусцілі. У інтэрв'ю "Нямецкай хвалі" сп. Мілінкевіч адзначыў:

"Я прыйшоў, бо лічу сваім маральным абавязкам падтрымаць Казуліна, які быў таксама кандыдатам у прэзідэнты. Лічу, што гэта абсалютна незаконнае затрыманне. Гэта была мірная дэманстрацыя, хаця я быў супраць яе. Але калі сёння ён за кратамі, і яму пагражае заключэнне ў турму, я салідарны з ім і паднімаю гэтае пытанне на ўсіх узроўнях і лічу, што і ён, і іншыя палітычныя вязні павінны быць вызваленыя.

Я лічу, што суд фактычна закрыты, таму што ўлада адчувае сябе няўпэўнена. Улада ведае, што закон тут не прычым, і таму не хоча зрабіць нармальны публічны суд".

Прыйшоў выказаць салідарнасць з Казуліным і яго палітычны апанент Мікола Статкевіч, які атрымаў водпуск у сябе на "хіміі". Нагадаем, раней адбыўся драматычны раскол узначаленай Статкевічам сацыял-дэмакратычнай партыі, і частка партыйцаў, якая сыйшла пад кіраўніцтва Казуліна, Мінюст Беларусі прызнаў правапераемніцай усёй партыі.

Мікола, ў вас не вельмі простыя адносіны з Казуліным. Тым не менш, як толькі вы атрымалі адпачынак, вы прыехалі сюды, на пачатак суда. Як вы можаце гэта пракаментаваць?

“Нічога асабістага. Я не магу вызначыць стаўленне да сп. Казуліна як да палітыка. Але ёсць чалавек, які незаслужана і несправядліва апынуўся пад арыштам і ў судзе. І калі мы дэмакраты, то мы павінны абараняць гэтага чалавека і патрабаваць яго вызвалення”.

Тым часам, працэс над Казуліным пачаўся. Суд адхіліў усе хадайніцтвы падсуднага і яго абароны, а потым выдаліў з залы публіку. Гэта здарылася пасля таго, як у зале засмяяліся над словамі дзяржаўнага абвінаваўцы, які заявіў, што відэаздымка ў зале суду будзе парушаць парадак працэсу, а дачка Козулина не можа прадстаўляць інтарэсы абароны, бо не мае адвакацкай ліцэнзіі, хоць закон гэтага і не патрабуе. У другой палове дня працэс працягнуўся.