На Беларусі ўпершыню вынесены прысуд за падрыхтоўку да тэрактаў | Беларусь и белорусы: новости и аналитика | DW | 29.05.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Беларусь

На Беларусі ўпершыню вынесены прысуд за падрыхтоўку да тэрактаў

Суд Шчучынскага раёну прысудзіў да 5 месяцаў арышту актывіста выбарчай кампаніі апазіцыі, сябра Партыі БНФ Сяргея Ляшкевіча за навучанне і іншую падрыхтоўку да тэрарыстычных актаў.

Суд прыняў да ўвагі сведачанні галоўнага сведкі абвінавачання – Аляксандра Бурдзея. У сакавіку бягучага году ён звярнуўся з пакаяннем да міліцыі і паведаміў, што Сяргей Ляшкевіч нібыта рыхтаваў яго да правядзення тэрарыстычных актаў падчас масавых беспарадкаў, якія, паводле сведкі, павінныя былі арганізаваць апазіцыйныя сілы ў Минску 2 і 19 сакавіка.

У якасці рэчавага доказу вінаватасці Ляшкевіча суд прызнаў фанаграмы размовы з абвінавачаным, якія патаемна зрабіў Аляксандр Бурдзей. Дарэчы, яшчэ на першым паседжанні суду ў мінулы чацвер суддзя адзначыў, што якасць запісу дрэнная, а таму на судзе была зачытаная раздрукоўка размовы. З яе выходзіла, што Бурдзей прасіў у актывіста Ляшкевіча грошы на паездку ў Мiнск. Адказы абвінавачанага былі невыразныя. Тым не менш, гэты запіс дазволіў суду абвінаваціць шчучынскага актывіста выбарчай кампаніі Мілінкевіча ў навучанні тэрарызму, а дакладна, пагромам, падпалам і ўзброенаму супраціву міліцыянтам.

Рэчавымі доказамі віны Ляшкевіча для суда таксама з”явіліся мультфільмы з выявай Лукашэнкі і выдэакліпы, на якіх былі змантаваныя кадры разгону дэманстрацыяў апазіцыі ў Мiнску. Менавіта ў іх суддзя Віталь Сініла ўбачыў, цытую, “выпрацоўку звычкаў па ўдасканаленні тэрарыстычных дзеянняў у часе масавых хваляванняў, а таксама фармаванне прыхільнасці да гвалту”.

Размовы Ляшкевіча са сведкам аб магчымых акцыях пратэсту, суд прызнаў даваннем сведчанняў пра месца, час і планы правядзення тэрарыстычных актаў. Пры гэтым сведка Бурдзей не назваў імёны тых, з кім ён нібыта павінен быў сустрэцца ў Мiнску, а таксама не паведаміў суду пра дакладнае заданне, якое ён быў павінен выконваць у часе гэтых акцыяў.

У выраку суду гаворыцца таксама, што адсутнасць масавых беспарадкаў у вызначаны час у вызначаным месцы не здымае віны з абвінавачанага.

“Усё абвінавачанне грунтуецца на абгаворы Ляшкевіча і пабудаванае на меркаваннях таго, што, маўляў, магло б адбыцца”, – пракаментаваў вырак суду кіраўнік Гарадзенскай абласной арганізацыі Партыi БНФ Сяргей Мальчык. Больш за ўсё ён абураны тым, што Ляшкевіча абвінавацілі ва ўдзеле ў апазіцыйным руху і прыналежнасці да зарэгістраванай Партыі БНФ.

Нягледзячы на тое, што пракурор заклiкаў удзельнікаў працэсу не эксплуатаваць палітычныя матывы, маці Ляшкевіча Ірына лічыць, што міліцыя, суд і пракуратура выканалі палітычную замову.

Прысуд аб арышце Сяргея Ляшкевіча на 5 месяцаў атрымае сiлу праз 10 дзён. За гэты час можна падаць скаргу на рашэнне судe. Але Ірына Ляшкевіч упэўненая ў тым, што, цытую, “лёс людзей у Беларусі вяршыць адзіны чалавек, а таму скардзіцца не мае сэнсу». Да таго ж, прысуд вынесены па злачынстве, якое аднесенае да катэгорыі меньш цяжкіх, гэта значыць, што яе сын можа быць вызвалены пасля паловы тэрміну, а ён ужо сыходзіць, бо Сяргей Ляшкевіч быў арыштаваны 14 сакавіка.

Аляксандр Мілінкевіч,які прысутнічаў на першым паседжанні суду над Сяргеям Ляшкевічам, назваў гэты працэс паказальным і папярэджаннем для ўсёй апазіцыі.