“Рэпарцёры без межаў” асуджаюць дзеянні беларускіх уладаў дачынна газеты “Наша Ніва”
20 апреля 2006 г.Міжнародная праваабарончая арганізацыя “Рэпарцёры без межаў” распаўсюдзіла заяву, у якой асуджае ціск беларускіх уладаў на незалежную газету “Наша Ніва”. Як паведамлялася, у лісце на імя галоўнага рэдактара Андрэя Дынько за подпісам намесніка старшыні Мінгарвыканкаму Міхаіла Ціцянкова было заяўлена пра немэтазгоднасць размяшчэння выдання ў сталіцы. Дадзеная рашэнне матывуецца тым, што Дынько ў сакавіку быў арыштаваны на 10 сутак. На думку “Рэпарцёраў без межаў”, рашэнне Мінгарвыканкаму “абсалютна абсурднае”. Эксперты арганізацыі заяўляюць, што чыноўнік з ідэалагічнага аддзелу “не павінен умешвацца ў пытанні адміністратыўнага характару”. “Адміністратыўны ўціск – беларуская адмысловасць, іншыя незалежныя газеты пацярпелі па гэткай жа схеме”, - азначаецца ў заяве арганізацыі. “Рэпарцёры без межаў” падкрэсліваюць, што мінулыя прэзідэнцкія выбары сталі “сігналам да разгортвання кампаніі пераследу СМІ, чый пункт гледжання розніцца з афіцыйным”.