Праваахоўныя органы зацікавіліся сябрамі “Маладога фронту”, якія трымаюць галадоўку

Актывістамі «Маладога фронту», якія трымаюць галадоўку ў Салігорску, зацікавіліся праваахоўныя органы. Як паведаміў удзельнік галадавання Іван Шыла, з ранку ў кватэру пазваніў капітан міліцыі, якога суправаджаў чалавек у цывільным. Супрацоўнік міліцыі пацікавіўся ў маладзёнаў, якія яны выстаўляюць патрабаванні. Праз зачыненыя дзверы маладафронтаўцы распавялі пра мэты сваёй галадоўкі. Пасля таго, як гутарка з візіцёрамі скончылася, юнакі з балкону ўбачылі людзей у цывільным, якія групкамі прагульваліся пад іх вокнамі. Апрача таго, відэакамера, якая размешчаная на ўзвышшы аб'яднання «Беларуськалій» і звычайна здымае цэнтральную гарадскую плошчу, павернутая ў бок кватэры, дзе знаходзяцца сябры «Маладога фронту». Тым часам, да галадоўкі з патрабаваннем спыніць крымінальны пераслед актывістаў далучыліся мінскія і гарадзенскія сябры “Маладога фронту”. Сваёй адмовай ад ежы яны хочуць прыцягнуць увагу грамадзтва да палітычнага пераследу, які мае месца ў Беларусі.