“Каб была добра зразумелая сістэма падліку галасоў”

Актывісты кампаніі ўсведамляюць, што дабіцца змяненняў у выбарчае заканадаўства за час, які застаўся да парламенцкіх выбараў, практычна немагчыма, таму вырашылі аказваць пэўны ўціск на Цэнтравыбаркам (ЦВК), якая мае магчымасці ўплываць на сітуацыю шляхам уласных пастановаў і праз іх хаця б наблізіць выбарчую кампанію хоць да нейкіх больш-менш дэмакратычных нормаў.

Галоўная мэтавая група – беларускія грамадзяне

Як адзначыў каардынатар кампаніі, экс-дэпутат Вярхоўнага Савету 12-га склікання Віктар Карняенка, што актывісты распрацавалі механізм, якім чынам будуць дамагацца таго, каб дэмакратычныя партыі мелі сваё прадстаўніцтва ў выбарчых камісіях. “Каб была добра зразумелая сістэма падліку галасоў і каб назіральнікі мелі рэальную магчымасць назіраць за працэсам, а не проста быць клоўнамі, якія забяспечваюць толькі нейкую дэмакратычную шырму выбарчаму працэсу”, - гаворыць Віктар Карняенка. Акрамя таго, ён бачыць у гэтым магчымась весці кандыдатам нармалькую агітацыйную кампанію”.

Галоўнай мэтавай групай дзейнасці кампаніі “За свабодныя выбары!” з’яўляюцца грамадзяне Рэспублікі Беларусь. «Мы павінны давесці да іх ўсё тое, што адбываецца з выбарамі ў Беларусі. Калі ЦВК не пойдзе нам насустрач, мы павінныя апеляваць, у першую чаргу, да насельніцтва Беларусі”, - гаворыць Віктар Карняенка.

Не толькі переканаць ЦВК, але і змяніць грамадскую думку

Каардынатар кампаніі упэўнены, што “калі людзі, якія раней у дзяржаве займалі высокія пасады і маюць досвед грамадска-палітычнай дзейнасці, і іх не ўключаюць у камісіі нават шэраговымі сябрамі, то тады людзі зразумеюць, навошта гэта робіцца, і змена грамадскай думкі таксама ёсць мэта нашай дзейнасці, а не толькі пераканаць ЦВК”, - адзначыў каардынатар кампаніі “За свабодныя выбары!” Віктар Карняенка.

“Мы разумеем, што ЦВК не прымае ніякіх рашэнняў, што гэта палітычныя рашэнні аднаго чалавека, а наша задача – дамагчыся пераменаў незалежна ад таго, які настрой у гэтага чалавека. Мы павінны прымусіць улады змяніць сваё стаўленне, паводзіны ў адносінах да электаральных кампаніяў у нашай краіне”, - падкрэсліў Віктар Карняенка.

Паводле ягоных словаў, копіі прапановаў, якія будуць накіраваныя ў Цэнтравыбаркам, будуць таксама дасланыя ў адпаведныя міжнародныя структуры, уключна Бюро па дэмакратычных інстытутах і правах чалавека АБСЕ (БДІПЧ АБСЕ).