1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ
شخړي

په غزني کې له طالبانو سره سخته جګړه روانه ده

۱۳۹۷ اردیبهشت ۲۶, چهارشنبه

افغان چارواکي وايي چې په غزني کې د افغان امنیتي ځواکونو او وسله والو طالبانو تر منځ سختې نښتې روانې دي. دا په داسې حال کې ده چې تیره ورځ طالبانو پر فراه ښار هم يرغل کړی وو.

https://p.dw.com/p/2xnm3
Afghanistan Sicherheitskräfte
انځور له ارشیف څخهانځور: Getty Images/AFP/W. Koshar

د غزني د ولایتي شورا غړي احمد فقیري، ویلي دي چې د دې ولایت په پنځو ولسوالیو کې د نښتو په پايله کې ۲۱ افغان پولیس وژل شوي دي. هغه زیاته کړې ده چې اوس د جغتو ولسوالۍ پر مرکز باندي جگړه روانه ده.

فقیري زیاته کړې ده چې د جغتو ولسوالي د ملي امنیت ادارې مشر هم د وژل شویو کسانو په ډله کې دی. د فقیري په خبره د سه شنبې په ورځ پیل شوې نښتې اوس له جغتو او د ګیرو ولسوالۍ له ځینو سیمو پرته په نورو ولسوالۍ کې ختمي شوي دي.

د غزني د ولایتي شورا بل غړي غلام سخي امار، ویلي دي چې طالبانو د پولیسو قوماندنۍ ته اور ورته کړی دی او نښتې اوس هم روانې دي. هغه دا نه ده روښانه کړې چې په کومه ولسوالۍ کې د پولیسو د قوماندانۍ ودانۍ ته اور ورته شوی دی.

د غزني په ولسوالیو کې طالب جنګیالي او افغان ځواکونو له اوونیو راهیسې د ولسوالیو پر سر یو له بل سره په نښتو اخته دي. له بلې خوا پر فراه ښار باندې د طالب جنګیالیو ۲۲ ساعته برید د لسونو کسانو تر وژل کیدو وروسته پای ته رسیدلی دی. اوس یاغیان له ښار څخه پر شا شوي دي.

پر دې ښار باندې د برید په پایله کې د افغان ځواکونو په ګډون د ۳۵ او ۴۰ کسانو تر منځ وژل شوي دي. د افغانستان د دفاع وزارت ویاند محمد رادمنش ویلي دي چې د فراه ولایت پر مرکز باندې د برید په پایله کې شاوخوا ۳۰۰ طالب جنګیالي هم وژل شوي دي.

ځايي چارواکو په دقیقه توګه نه ده روښانه کړې چې پر دې ښار باندې د برید کوونکو طالبانو شمیر څومره وو، خو د هغوی شمیر د سونو او ۲۰۰۰ تر منځ ښوول شوی دی.