م.م : ايران په پټه سوريې ته وسلې ورکوي
۱۳۹۱ اردیبهشت ۲۸, پنجشنبه
پر ایران باندي د ملګرو ملتونو د څار د کمېسیون غړو تر اوسه پوري د ایران له خوا سوریې او طالباتو ته د غیر قانوني وسلو د استولو درې مورده موندلي دي. دا خبره آژانسونو د ملګرو ملتونو د امنیت شورا د سرچینو په حواله کړې ده.
د آژانسونو په رپوټونو کي راغلي دي چي ایران په اسنادو کي د تقلب له کولو سره هڅه کړې ده چي سوریې ته د وسلو استول پټ وساتي او پر ځان باندي له نړیوالو تحریمونو څخه مخنیوی وکړي.
ایران په سیمه کي د بشارالاسد وروستی متحد
ایران په سیمه کي د سوریې د رژیم وروستۍ متحد دﺉ. د بشارالاسد رژیم د ۲۰۱۱ کال د مارچ له میاشتي راهیسي د لاریون کوونکو پر وړاندي له تاوتریخوالي څخه کار اخلي.
د ملګرو ملتونو د شمیرو له مخي تر اوسه پوري په سوریه کي ۹۰۰۰ کسان وژل شوي دي. که څه هم د سوریې له پاره د ملگرو ملتونو د سولي پلان منل شوی دئ او د اوربند اعلان شوي دئ خو بیا هم په دغه هیواد کي تاوتریخوالی روان دئ.
په لندن کي د سوریې د بشري حقونو د څار ادارې ویلي دي چي یوازي د چهارشنبې په ورځ په سوریه کي ۲۶ کسان ووژل شول. د دې ادارې په خبره د چهار شنبې په ورځ په وژل شوو کسانو کي د حمص د ښاره ۱۵ تنه ملکي کسان هم شامل ول چي د دولتي ځواکونو له خوا اعدام شوي دي.
المان د اوربند د څار په عملیاتو کي ونډه اخلي
په برلین کي د المان د فدرال حکومت کابینې پریکړه وکړه چي په سوريه کي د ملگرو ملتونو د اوربند د څار په عملیاتو کي گډون وکړي. په پلان کي ده چي المان به سوریې ته خپل لس تنه غیر مسلح سرتیري واستوي. د المان د بهرنیو چارو وزیر گیدو ویستر ویله، وویل چي المان غواړي له سوله ییزي لاري د سوریې د شخړي د ختمولو له هڅو څخه لیري پاته نه شي.
د المان د دفاع وزیر توماس دیميزیر په دې اړه وویل: «د سوریې په عملیاتو کي چي هر څومره ډیر کسان گډون وکړي په هماغه اندازه د دې عملیاتو تاثیر پر بشارالاسد باندي ډیریږي.»
دویچه ویله/ مسعود جهش
کتونکی: نجیب الله زیارمل