ملګري ملتونه: اروپا ته د راغلیو مهاجرو ۲۱ سلنه افغانان دي

دا شمیره د ۲۰۱۴ کال په پرتله څلور برابره ډیروالی ښيي. په ۲۰۱۴ کال کې د ملګرو ملتونو د مهاجرت سازمان ویلي وه چې ۲۱۹ زره کسانو د سیند له سختو لارو ځان اروپا ته رسولی دی.

دې سازمان ویلي دي: «د هغو کسانو چې دا سختې لاري یې وهلي دي، ډیر شمیر یې نړیوال محافظت ته اړتیا لري.»

د مهاجرو کړکیچ د قابو کولو پر تګلارې د نظر د اتفاق نه شتون د اروپايې اتحادیې د مشرانو تر منځ درز رامنځته کړی دی. ډیر شمیر مهاجرین په جګړه ځپلو هیوادونو کې له تاوتریخوالي څخه تښتي او اروپا ته د یو هوسا ژوند په تمه راځي.

د دې سازمان په رپوټ کې راغلي دي چې د ۲۰۱۵ کال د جنوري میاشتي له لومړۍ نیټې راهیسې ۱۰۰۰۵۷۳ انسانانو د مدیترانې د سمندرګي له لارې څخه ځان اروپا ته رسولی دی او همداراز په دې لاره کې ۳۷۳۵ کسانو خپل ژوند له لاسه ورکړی دی.

د دې کسانو ډیر شمیر یونان ته راغلي دي. د کال له پیل راهیسې ۸۴۴۱۷۶ انسانان یونان ته رسیدلي دي او بیا ۱۵۲۷۰۰ انسانان ایتالیا ته رسیدلي دي.

دا شمیرې د سوريي د پنځه کلنې کورنۍ جګړي تاثیر ښيي چې د مهاجرت شکل یې بدل کړی دی.

په سوریي کې د تاوتریخوالي له کبله څلور میلیونه کسان دې ته اړ شوي دي چې خپل کورونه پریږدي. تر سږ کال پورې دا شمیر کسان د سوریې په ګاونډیو هیوادونو کې استوګن ول.

سر بیره پر دې چې ترکیې، اردن او لبنان ډیر شمیر سوریایي مهاجرو ته پناه ورکړې ده خو د سږ کال له پسرلي راهیسې بیا ډیر شمیر سوریایي مهاجرو اروپا ته مخ کړی دی.

په جون میاشت کې ۵۰ زره کسان له سمندر څخه تر تیریدو وروسته اروپا ته ورسیدل خو دا شمیره بیا په سپتمبر میاشت کې ۱۵۰ زره کسانو ته ورسیده او همداراز په اکتوبر میاشت کې ۲۱۸ زره کسانو ته لوړه شوه.

له سوریایانو ورسته، افغانان د مهاجرو تر ټولو لویه ډله جوړوي چې سږ کال اروپا ته د راغلیو مهاجرو ۲۱ سلنه افغانان دي. له افغانانو ورسته بیا اته سلنه عراقیان او څلور سلنه اریتریایان اروپا ته رسیدلي دي.

له پاکستان، نایجیریا، سومالیا، سودان، ګامبیا او مالي هیوادونو څخه هم مهاجرو ځان اروپا ته رسولی دی خو شمیرې یې ټیټې دي.

په عین حال کې د اروپا په ځینې سیمو کې د مهاجرو پر ضد مفکوره هم ډیر پلویان لري. د چک جمهوریت ولسمشر میلوس زیمان په خپلې ورستینۍ وینا کې وویل چې د مهاجرو څپې د اروپا «یو پلان شوی اشغال» دی.

هنګري هم د مهاجرو پر وړاندې یو سخت دریز لري.