امريکا ترکيې ته د اړيکو خرابېدو خبرداری ورکړ
۱۳۹۵ تیر ۲۷, یکشنبه
د امريکا د متحده ايالاتو ولسمشر باراک اوباما او د بهرنيو چارو وزیر جان کېري يې د انقرې پر لور څرګند پيغام لېږلی دی. دا د هغه وروسته چي په ترکيه کي د پوځي کودتا هڅه ناکامه سوه او انقرې د امريکا پر لور تورونه ولېږدول. د هغه وروسته د امريکا او ترکيې تر منځ اړيکي تر نوي فشار لاندي راغلې.
د امريکا د متحده ايالاتو ولسمشر باراک اوباما په انقره کي پر حکومت ږغ کړی چي حوصله وکړي او د کودتاچيانو پر ضد د مبارزې پر وخت قوانين مراعت کړي. ولسمشر اوباما د خپلو مشاورينو سره پر دې موضوع د بحث پر وخت دې ته اشاره کړې چي ترکيه د ترهګرۍ پر ضد په مبارزه کي هم د امريکا د متحده ايالاتو له پاره شريک هيواد دی.
«امريکا په تحقيقاتو کي همکارۍ ته تياره ده»
خو د امریکا د متحده ايالاتو د بهرنيو چارو وزير جان کېري تر اوباما په لا څرګندو الفاظو ترکيه مخاطبه کړې ده. هغه خپل ترکي هم منصب مولود چاوس اوغلو ته د دواړو هيوادونو تر منځ د اړيکو د زيانمنېدو څخه خبرداری ورکړی دی. کېري په روښانه توګه د ترکيې هغه تورونه رد کړل چي ګواکي امريکا د ترکيې په ناکامه پوځي کودتا کي لاس درلود.
د امريکا د متحده ايالاتو د بهرنيو چارو د وزارت له خوا ويل سوي: «هغه (کېري) دا خبره په روښانه توګه وکړه چي د امريکا متحده ايالات چمتو دي چي د ترکيې د چارواکو سره د پلټنو په ترڅ کي مرسته وکړي خو په عامه محضر کي داسي څرګندونې چي په ناکامه سوې کودتا کي د امريکا د متحده ايالاتو د ښکېلتيا د تور اشاره ورکوي، د دوو اړخيزو اړيکو له پاره تاواني دي.»
اوباما او کېري په ترکيه کي د کودتا د هڅې وروسته دغه په غندلې وه. خو د ترکيې د کار وزير سليمان سويلو وروسته داسي اشاره کړې وه چي ګواکي د امريکا متحده ايالات په خپله په دغه کودتا کي ښکېل ول.