کرکیټ: افغانستان په اسیايي لوبو کې دویم ځای خپل کړ | لوبي | DW | 03.10.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

لوبي

کرکیټ: افغانستان په اسیايي لوبو کې دویم ځای خپل کړ

د سریلانکا لوبډلې د افغانستان د کرکیټ لوبډلې ته په پای لوبه کې ماتې ورکړه او په دې ترتیب افغانستان د اسیايي المپیک لوبو کې دویم ځای خپل کړ. په یوه بله لوبه کې بنگله دیش له هانگ کانگ څخه لوبه وگټله او دریم مقام یې وگاټه.

په آسیايي اولمپیک سیالیو کې د افغانستان د کرکیټ لوبډلې په پای لوبه کې د سریلانکا له لوبډلې څخه ماته وخوړه. په دې ترتیب سریلانکا د لومړي ځای له خپلولو سره د سرو زرو مډال تر لاسه کړ. افغانستان د دویم ځای خپلولو سره د سپینو زرو مډال وگاټه او د دریم مقام د تر لاسه کولو له پاره د بنگله دیش او هانگ کانگ، د لوبډلو تر منځ سیالي وشوه چې هانگ کانگ په کې ماته وخوړه او بنگله دیش د برونزو یا ژیړو مډال وگاټه. افغانستان تیره ورځ په نیمه پای لوبه کې هانگ ته ماتې ورکړې وه. دغه سیالۍ په جنوبي کوریا کې تر سره کیږي.

د جمعې ورځې په لوبه کې سریلانکا د پچې یا ټاس تر گټلو وروسته خپله منډو جوړولو ته ملا وتړله او په وروستي اوور کې د ټولو لوبغاړو په سوځیدو سره یې افغانستان ته د لوبې د گټلو له پاره د ۱۳۴ منډو هدف وټاکه. افغان توپ اچوونکي یا بالران نن بیا هم ښه وځلیدل او د سریلانکا لوبډله یې دې ته پر نه ښوده چې افغانستان ته ډیر ستر هدف وټاکي.

د سریلانکا لوبډلې لومړنۍ وېکټه په دوهم اوور کې د ۷ په مجموعمي منډو ولویده. خو تر هغې وروسته د سریلانکا توپ وهونکي تم شول او دویمه ویکټه یې د ۷۹ په مجموعي منډو ولویده. تر هغې وروسته د سریلانکا لوبغاړي یو په بل پسې ژر ژر وسوځیدل او ټوله لوبډله د شلم اوور په لومړي توپ وسوځیده. د سریلانکا د لوبډلې له لورې د تري مانې ۵۷ منډې او د چاندي مال ۳۳ منډې د پام وړ وې.

د افغانستان له لوري تر ټولو زیات وېکټې محمد نبي واخیستي. هغه په درو اورونو کې څلور لوبغاړي وسوځول. گلبدین نایب بیا د مقابلې لوبډلې دوه، فرید احمد، محمد نسیم او فضل الرحمان بیا یو، یو لوبغاړ وسوځاوه.

سریلانکا د لومړي ځای په خپلولو سره د سرو زرو مډال وگاټه

سریلانکا د لومړي ځای په خپلولو سره د سرو زرو مډال وگاټه

خو د افغانستان توپ وهوونکي نن د سریلانکایي بالرانو پر وړاندې ټینگ نه شول او ټوله لوبډله په ۱۸ اورونو کې د ۶۵ منډو په جوړولو سره وسوځیده. د افغانستان لومړنۍ وېکټه د ۲۰ په مجموعي منډو ولویده. تر هغې وروسته څلور لوبغاړې یو په بل پسې داسې ژر ژر وسوځیدل چې هیڅ چا یې اټکل نه کاوه. د ۳۶ په مجموعي منډو د افغانستان پنځه لوبغاړي سوځیدلي وو.

محمد شهزاد چې د تیرې ورځې په بریا کې یې لوی لاس درلود او د ۴۱ منډو جوړولو وروسته هم ناسوځیدلې پاته وو، نن بې له کومې منډې جوړولو وسوځید. د افغانستان له لوري تر ټولو زیاتې منډې نجیب ترکې جوړې کړې چې په شپاړلسو توپونو ۱۷ منډې وې. د سریلانکا توپ اچونکي مېنډس درې افغان لوبغاړي وسوځول. په پای کې د افغانستان ټوله لوبډله په اتلسم اوور کې د ۶۵ منډو په جوړولو وسوځیده او سریلانکا دغه لوبه د ۶۸ منډو په توپير سره وگټله.

بنگله دیش هانگ کانگ ته ماتې ورکړه

د دریم ځای د خپلولو له پاره د بنگله دیش او هانگ د لوبډلو تر منځ سیالي وشوه. بنگله دیش په ټاکل شوو ۲۰ اوورنو کې د ۶ لوبغاړو په سوځیدو سره ۱۶۲ منډې وکړې. خو په ځواب کې د هانگ کانگ لوبډلې په ټاکل شوو ۲۰ اوورونو کې د ۷ لوبغاړو په سوځیدو سره ۱۳۵ منډې جوړې کړای شوې او بنگله دیش دغه لوبه د ۲۷ منډو په توپیر سره وگټله او دریم ځای یې خپل کړ. هانگ کانگ تیره ورځ په نیمه پای لوبه کې له افغانستان څخه هم ماته خوړلې وه.