1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

څارنیز بنسټونه: د کانونو د قانون مسوده باید بدله شي

د افغانستان د طبیعي ځیرمو د څارنې شبکې د پارلمان پر وړاندې د مظاهرې په لاره اچولو سره د کانونو د قانون په مسوده کې د بدلون غوښتنه وکړه. په دې شبکې کې ۲۲ مدني بنسټونه غړیتوب لري چې وایي دغه قانون د افغانستان په ضرر دی.

د افغانستان د کانونو د قانون مسوده اوس په پارلمان کې ده او د پلان له مخې به ژر تصویب شي. خو د افغانستان د کانونو د څار شبکه وایي چې دغه قانون د اقتصادي مافیا په گټه او د افغانستان د ملت په ضرر دی.

د پارلمان پر وړاندې د مظاهرې یوه سازمان ورکوونکي جاوید نورستاني وویل، په دې قانون کې راغلي دي چې له افغانستان څخه خام معدني مواد وایستل شي چې دغه موضوع د افغانستان په ضرر ده: «له ۲۰ څخه تر ۲۵ زره ټنه زغال هر ورځ له افغانستان څخه بهر وځي. پر دې سربیره د کرومایت او مرمر تیږې هم له افغانستان څخه وځي چې دا په هیڅ صورت زموږ د هیواد په گټه نه ده.»

د مظاهره کوونکو په خبره د کانونو د ایستلو کار له پیلیدو سره د سیمې اوسیدونکي بې ځایه کیږي او د هغوی له له پاره د قانون په مسوده کې بدیلې ځمکې په پام کې نه دي نیول شوې. دغه کسان همداراز نیوکه کوي چې په دې قانونه کې د چاپیریال او اوبو کړکړیدو ته هم په جدي توگه اشاره نه ده شوې.

د کانونو د څار شبکې غړي ضیا محمدي، وویل که چیرې دغه قانون له بدلونونو پرته تصویب شي، نو د افغانستان خلکو ته به زیان ورسیږي: «دغه قانون کولای شي چې حکومت ته له کانونو څخه د ناوړه گټه اخیستنې امکانات ورکړي. که د دغه قانون له مخې د کانونو تړونونه لاسلیک شي، زه ډاډه یم چې د افغانستان خلکو ته زیان رسیدای شي.»

د دغې شبکې د غړو په خبره د وړاندیز شوي قانون په مسوده کې د کانونو د تړونونو او د هغوی د کیندنې له بهیر څخه څارنه ډیره ضعیفه ده او له همدې کبله کولای شي د لویو کمپنیو او دولت له پاره د ناوړه گټه اخیستنې زمینه برابره کړي.

ودود پدرام هم د مظاهره کوونکو په ډله کې وو. هغه وویل: «د کانونو د کیندنې او د هغوی د تړونونو د لاسلیکولو په اړه په وړاندیز شوي قانون کې قوي مادې نه شته ترڅو دغه بهیرونه شفافه کړي. د کانونو په اړه چې کوم تړونونه کیږي باید د کانونو د وزارت په انترنتي پاڼه کې خپاره شي ترڅو یې خلک پر جزییاتو باندې خبر شي.»

په همدې حال کې د پارلمان غړي په دغه قانون کې د یو شمیر ضعفونو شتون مني او وايي چې هغه باید اصلاح شي. خلیل احمد شهیدي، چې مظاهره کوونکو د غوښتنو د اوریدو له پاره راغلی وو وویل: «موږ هڅه کوو چې د قانون تصویب د څو ورځو له پاره وځنډوو، ترڅو ستونزې حل شي. ستاسو غږ به واوریدل شي.»

تر دې مخکې د افغانستان یو شمیر رسنیو د کانونو د تړونونو په اړه یو شمیر څیړنیز رپوټونه خپاره کړي ول چې په ځینو مواردو کې یې دا خبره څرگنده کړې وه چې دغه تړونونه په غیر شفات توگه ترسره کیږي.

DW.COM