1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

پیښورۍ څپلۍ او سیاست

پیښورۍ څپلې د خیبر پښتونخوا په کلتور کې خاص ځای لري او په ټول پاکستان کې هم ډیرې مشهوري دي. د وخت په تیریدو سره که له یوه اړخه یې په جوړښت کې نوی والی راغلی نو له بل اړخه هغه په سیاست کې هم ښکیلې شوې دي.

د پیښور په نمک منډي کې د پیښورۍ څپلیو په زوړ مارکیټ کې له یوه طرفه د «کپتان چپل» چې عمران خان ته منسوبیږي تقاضا خپل عوج ته رسیدلې، نو له بل اړخه له گران بیه څرمنې څخه جوړې د نواز شریف او شهباز شریف په نوم څپلیو عوام خپل لور ته راجذب کړی دی.

د پاکستان تحریک انصاف د مشر عمران خان، له لوري د پیښورۍ څپلیو سره د لیوالتیا وروسته په ځانگړي شکل کې جوړې شوې څپلۍ په ټول پاکستان کې یو ځانگړی شناخت راخپل کړی دی. ځوانه طبقه هغه د فیشن په توگه په پښو کوي. خو اوس شریف ورونو ته منسوب شوې پیښورۍ څپلې هم ډیر مینه وال لري.

Pakistan Peschawar Lederschuh Produktion Schuster Chappal

په پاکستان کې د څپلیو بازار

د محمد عرفان په نوم یو کس چې د پیښور څپلیو مارکیټ ته راغلی وایي چې په سیاست کې یې عمران خان خوښیږي خو هغه نواز شریف نومې څپلۍ رانیسي. ځکه چې په وینا یې د کپتان څپلیو بیه ډیره گرانه ده. محمد عرفان وړاندې وایي چې د کپتان څپلیو وزن هم زیات دی او د هغې په پرتله نواز شریف څپلۍ سپکې او «ستایلي» یا ډولي دي.

سید حسن علي شاه کابو له څلویښتو کلونو راهیسې د پيښور په جهانگیر پوره کې د څپلیو جوړولو کاروبار کوي. د هغه په خبره د پخواني وخت په پرتله په تیرو دوو کلونو د هغه کاروبار ښه شوی دی چې په وینا یې ستره وجه یې «کپتان چپل» یا څپلۍ دي.

د حسن علي په وینا د عمران خان له لوري د څپلیو تر پښو کولو وروسته پر پاکستان سربیره له افغانستان، متحده عربي امارات، بریتانیا، آلمان، ایټالیا او امریکا څخه د هغې په تقاضا کې ډیروالی راغلی دی. د حسن علي په خبره په مارکیټ کې د نواز شریف او شهباز شريف په نوم څپلۍ هم جوړیږي خو په نسبي توگه د هغې تقاضا په پنجاب ایالت کې ډیره ده.

Pakistan Peschawar Lederschuh Produktion Schuster Chappal

د څپلیو جوړونکي

حسن علي شاه وړاندې وايي چې په کپتان څپلیو، کې یو څه سیاست او د خپلې خوښې د مشر عنصر شامل دی خو په وینا یې په بیلا بیلو ډولونو کې د خلکو خپله خوښه، د څرمنې کیفیت او د هغې ډیزاین هم نقش لري. د هغه په وینا په مارکیټ کې د څپلیو بیه له درې سوو کلدارو څخه پیلیږي او آن تر زرونو کلدارو رسیږي، خو زیاتره خلک کپتان څپلۍ غواړي چې بیه یې لږ تر لږه څلور زره کلدارې ده.

د څپلیو دغه جوړونکی وایي چې د کپتان څپلیو په پرتله د «شریف ورونو» نوم ته د منسوب شویو څپیلو بیه ډیره ټیټه ده. د څپلیو دغه جوړونکی وایي کله چې بازار ته د شریف ورونو په نوم څپلۍ راووتې نو داسې فکر کیده چې په ښه بیه به وپلورل شي خو دا فکر سم نه وو. د هغه په خبره نواز شریف په نوم څپلۍ په ۱۴۰۰ کلدارو پلورل کیږي او د شبهاز شریف په نوم بیا ۱۸۰۰ کلدارې.

حاجي جهانگیر چې له څو کلونو راهیسې د څپلیو کاروبا کوي وایي چې د اختر له پاره یې د پاکستان د لومړي وزیر نواز شریف له پاره د پړانگ له گران بیه څرمنې څخه څپلۍ جوړې کړي دي.

Pakistan Peschawar Lederschuh Produktion Schuster Chappal

د څپلیو بیه د هغه موادو او جوړښت پورې اړه لري.

د هغه په خبره له یوې اوږدې مودې راهیسې د سیاستوالو او نورو مشهورو کسانو له پاره د خاصې څرمنې څخه څپلۍ جوړوي. حاجي جهانگیر وایي چې د دوی جوړې څپلۍ پر گورنر هاوس سربیره د هیواد نورو سیمو ته راغلي جگپوړو چاواکو او سفیرانو ته د ډالۍ په توگه ورکول کیږي. په پیښور کې د څپلیو په مارکیټ کې د سیاست د ډگر د باندې د شاهد آفریدي، په نوم څپلیو بازار هم ډیر تود دی.