1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

بشري حقونه

په گوانتانامو کي نوی احتجاج

په ګوانتانامو زندان کې ترينګلتيا نوره هم ډېره شوې ده. له هغه وروسته چې يو شمېر بنديانو د نه خوړلو اعتصاب کړی وو، اوس هغوی احتجاج هم کړی دی، چې ساتونکو يې پر وړاندي ربړي مرمۍ کارولي دي.

د گونتانامو زندان وياند رابرت دورند ويلي دي، چي بنديانو څارونکي کمرې، کړکۍ او بېلونکي ښيښه يي دېوالونه په خپله لويه کوټه کې پوښلي ول. کله چې ساتونکو د دغه کار پر وړاندې اقدام وکړ، نو بنديانو ورباندې په سوټو او نورو وسايلو حمله وکړه.

د هغه په خبره، تردغي پېښي وروسته ساتونکو ربړي مرمۍ و کارولې او د دواړو خواوو څخه يو شمېر خلک فقط سرسري ژوبل شوي دي. تر دې وروسته د «کمپ ۶» بنديان پر جلا جلا کوټو ووېشل شول.

په ګوانتانامو کې له فبرورۍ مياشتې راهيسې يو شمېر بنديانو د نه خوړلو اعتصاب پيل کړی دی، چې دقيق شمېر يې څرګند نه دی. په داسې حال کې چې مدافع وکيلان وايي چې د کمپ ۶ له ۱۳۰ بنديانو څخه لويه برخه په دغه اعتصاب کې ونډه لري، خو پنتاګون بيا وايي چې ۴۳ تنه د اعتصاب په توګه ډوډۍ نه خوري چې ۱۱ تنو ته په زور خواړه ورکول کيږي.

اعتصاب د ناهيلۍ پر وړاندي

بنديان د خپل اعتصاب لامل دا بولي چې ساتونکو په کوټو کې د تلاښيو پر مهال قران شريف ته په سپکه سترګه کتلي دي. حقوقپوهان، پوځيان او د بشري حقونو ټولني بيا د نه خوړلو اعتصاب د بنديانو د ترينګلي وضعيت او ناهيلۍ نخښه هم بولي.

له ۲۰۰۲ کال راهيسې په ګوانتانامو کې په ترهګرۍ تورن کسان، چې ورباندي د القاعدې په څېر له ترهګرو ډلو سره د اړيکو تور لګول کيږي، پرته له محاکمې زندان ته اچول شوي دي.

ولسمشر بارک اوباما د ګوانتانامو د کمپ د تړلو ژمنه په ۲۰۰۸ کال کې تر ټاکل کېدو مخکې کړې وه. کانګرس بيا د دغه کار له پاره لازم مالي امکانات په اختيار کې نه ورکوي او د امريکا متحده ايالاتو ته د بنديانو انتقال هم نه مني. په اوس وخت کې ۱۶۶ تنه په ګوانتانامو کې بنديان دي، چې پخوا دغه شمېر آن ۷۷۹ تنو ته رسېده.

دوې ورځې مخکې د بخښنې نړيوال سازمان او د بشري حقونو د څار ټولنې په شان د بشري حقونو۲۵ بېلو بېلو ټولنو د يو پرانيستي ليک په واسطه له اوباما څخه وغوښتل چې د دغه زندان په اړه اقدام وکړي. يا دې پاته زندانيان خپلو هېوادونو يا دريمګړو هېوادونو ته ولېږل شي، که نه نو محاکمه دې شي.