1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په کابل کي چاودني يو کس وژلی او۲۲ ټپيان کړي دي

افغان امنيتي چارواکي وايي چي د کابل په زړه کي د ناتو ځواکونو پر کاروان باندي په ځانمرگي بريد کي يو کس وژل سوی او نزدې ۲۲ نور ټپيان سوي دي. پيښه د امريکا سفارت او ستري محکمې ته نژدې رامنځ ته سوې ده.

د کابل د امنيې قوماندانۍ مرستيال سيد گل آغا اسوشېتد پرس خبري آژانس ته ويلي دي: «دا يو ځانمرگی بريد وو. بريد کوونکي د چاودېدونکي موادو ډک موټر ته چاودنه ورکړه. چاودنه ډېره پياوړې وه او تر ډېره ځايه پوري ئې د ودانيو ښيښې ماتي کړي دي.»

په افغانستان کي د «پريکړنده ملاتړ» ماموريت وياند بريان تريبوس، ويلي دي چي په دغه چاودنه کي د دوی هيڅوک ټپي سوی نه دئ.

د پيښي پړه وسله والو طالبانو اسوشېتد پرس خبري آژانس ته په يوه لېږل سوي لنډ پيغام کي منلې ده.

په دغه ځانمرگي بريد کي چي په کابل کي د امريکا سفارت په نزدې ۵۰۰ ميترۍ کي سوی دی د دباندنيو ځواکونو دوه موټره سخت ويجاړ سوي دي. دا لا تر اوسه پوري روښانه نه ده چي په دغو موټرو کي سپرو کسانو ته زيان رسېدلی که نه. د امريکا سفارت وياند ويلي دي چي د سفارت ټول کارکوونکي ئې روغ رمټ دي.

د افغانستان د کورنيو چارو وزارت وياند صديق صديقي، ويلي دي چي په دغه پېښه کي يو ملکي وژل سوی او ۲۲ نور ټپيان سوي دي.

د کابل د يوه روغتون رئيس کبير اميري، ويلي دي چي دوی ته ئې ۱۹ کسان ټپيان ور وړي دي، چي څلور کوچنيان او درې ښځي هم پکښې شاملي دي.

دغه ځانمرگی بريد په داسي حال کي سوی چي د روژې مياشتي په خاطر دولتي مامورين نيمه ورځ کار کوي او د غرمې پر دولسو جبو کورونو ته روانيږي.

يوه عيني شاهد احمد فرهاد خبري رسنيو ته ويلي دي: «ما خپله وليده چي يو کرولا موټر د دباندنيو ځواکونو کاروان هدف وگرځاوه او وچاود. ما دوه درې ويجاړ موټر وليدل او هري خوا ته ټپيان پراته ول او هيڅوک نه ول چي مرسته ورسره وکړي.»

نن دغه راز د هلمند ولايت په مرکز لښکرگاه ښار کي پر امنيې قوماندانۍ باندي په ځانمرگي بريد کي درې کسان ووژل سول او تر ۵۰ زيات ټپيان سول. ويل کیږي چي په ټپيانو کي ډيری ښځي او کوچنيان دي. پوليس هم پکښې شامل دي.

د دغه ولايت د پوليسو وياند فريد احمد عبيد، ويلي دي چي د چاودېدونکو موادو ډک موټر د قوماندانۍ مقر د شا دېوال سره په دې نيت وجنگول سو او وچاود چي دروازه له منځه يووسي.