1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په کابل کي ځانمرگي بريد ۱۲ کسان ووژل

افغان چارواکي وايي، چي یوه ځانمرګي برید کوونکي نن سهار وختي د کابل هوايي ډګر پر سړک د يوه بهرني شرکت له موټر سره نزدې ځان والوزاوه او ۹ تنه بهرنيان او ۳ تنه افغانان ئې ووژل.

د کابل د امنيې قوماندانۍ مرستیال محمد داود امین د پېښې په ځای کي رسنیو ته وویل، چي د ځانمرګي برید هدف د هغه بهرني شرکت موټر وو چې ددغه شرکت پيلوټان پکښې سپاره ول.

د ښاغلي امین په وینا د برید په ترڅ کي د شرکت ۶ پيلوټان،۱ افغان موټرچلوونکی او ۲ تنه نور ملکي وګړي وژل شوي دي.

خو د کابل له امنيې قوماندانۍ څخه خپره شوې خبرپاڼه بيا وايي، چي په دغه ځانمرګي برید کي د یوه بهرني شرکت ۹ بهرني کارکوونکي او ۳ تنه ولسي افغانان وژل شوي دي او ۲ تنه افغان سرتیري ټپيان دي.

سره له دې چي د امنيې قوماندانۍ په خبرپاڼه کي د بهرنیانو هویت نه دئ ښوول شوی خو د قوماندانۍ مرستیال وايي، چي دغه بهرني پيلوټان د روسيې او سویلي افریقا وگړي ول.

خو په کابل کي د روسيې سفارت وياند ستيپان انيکې يو، دغه خبر رد کړی دئ، چي گواکي په دې بريد کي دي روسي وگړي وژل سوي وي. د هغه په خبره په وژل سويو کسانو کي ۷ تنه ئې د جنوبي افريقا يو تن د قرغزستان يو افغان ژباړن او يو هم افغان موټر چلوونکی شامل دئ.

د پیښي مسئولیت د ګلبدین حکمتیار په مشرۍ اسلامي حزب پر غاړه اخيستی دئ او ادعا ئې کړې ده چي دغه ځانمرګی برید د کابل يوې شل کلني مېرمني فاطمې کړی دئ.

دوی دغه راز ادعا کړې ده، چي د دغه ځانمرگي بريد په ترڅ کي زیات شمېر بهرني استخباراتي کسان وژل شوي دي.

د دغي ډلي يوه وياند زبير صديقي په کابل کي خبريالانو ته ويلي دي، چي دغه برید ئې په امریکا کي د اسلام ستر پيغمبر حضرت محمد (ص) ته د سپکاوي د فلم په غبرګون کي کړی دئ.

محمد اسماعيل شاکر/dpa/ کابل
کتونکی: نجيب الله زيارمل