په کابل کي لاريون په تاوتريخوالي واوښت | افغانستان | DW | 17.09.2012
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په کابل کي لاريون په تاوتريخوالي واوښت

په سوو افغانانو نن په کابل کي د هغه امريکايي فلم پرضد له تاوتريخوالي ډکه مظاهره پيل کړه، چي د اسلام پيغمبر حضرت محمد(ص) ته پکښې سپکاوی سوی دئ.

مظاهره کوونکي د ناټو مرکزته نزدې د هود خيلو په سيمه کي د کابل-جلال اباد لويه لاره بنده کړې ده او پر سړک باندي ئې ټايرونو او شخصي موټرو ته اور اچولی دئ.

د کابل امنيه قوماندان محمد ايوب سالنگي د فرانسې خبري آژانس ته ويلي دي، چي مظاهره کوونکو د پوليسو يوه رنجرموټر او درو شخصي موټرو ته ور اچولی دئ، او د „ مړه دي وي امريکا“ چغي وهي او په امریکا کي د فلم جوړوونکي د محاکمه کولو غوښتنه کوي.

په امريکا کي دغه جوړسوي فلم د مسلمانانو غوسه راپارولې ده او په ټوله نړۍ کي له تاوتريخوالي ډکي مظاهرې رواني دي.

د سالنگي په خبره، د مظاهره کوونکو شمېر نزدې ۱۰۰۰ کسانو ته رسيږي او وايي، چي پر پوليسو ئې ډزي هم کړي خو تر اوسه پوري چاته زيان نه دئ رسېدلی:

«د مظاهره کوونکو په ډله کي وسله وال کسان هم سته، پر پوليسو ئې ډزي کړي دي خو پوليسو جوابي ډزي نه دي کړي.»

په کابل کي د دويچه ويله پښتو ويبپاڼي خبريال وايي، چي په سيمه کي ټول دوکانونه تړل سوي دي، او پر سړک باندي هري خواته غټي غټي ډبري ايښول سوي دي، چي د تگ راتگ مخه ونيسي.

تازه راپورونه وايي، چي د پوليسو دوه موټره او څلور شخصي موټرو ته اور اچول سوی دئ او پر ۸ کانتينرونو باندی هم لمبې گرځي. ويل کيږي چي پوليسو له کورنيو چارو وزارت څخه د مرستي غوښتنه کړې ده.

يوه سيمه ييز پوليس چي خپل نوم ئې يوازي حافظ ښوولی دئ، ويلي دي چي مظاهره کوونکو په سيمه کي د امريکايي ځواکونو پر „ کمپ فينکس“ باندي ډبري اورولې او پوليسو هغوی بيرته له سيمه څخه د هود خيلو بازار ته پر شا کړل.

په کابل کي د امريکا په مشرۍ د ايساف ځواکونو يوه وياند هاگن مسسير د فرانسې خبري آژانس ته ويلي دي، چي مظاهره کوونکي د فينکس کمپ ته نزدې سوي ول، خو پوليسو بيرته پرشا کړي دي:

«موږ حالت له نزدې څارو او موږ د تيارسی په حال کي يو. خو دا کار د پوليسو دئ.»

په افغانستان کي اکثره وخت دغه ډول لاريونونه په تاوتريخوالي اوړي. په ځانگړې توگه اسلام ته د سپکاوي پر ضد لاريونونه. خو د شنبې تر ورځي پوري په افغانستان کي اسلام ته د سپکاوي پر ضد لاريونونه سوله ييز ول.

آژانسونه/ نجيب الله زيارمل
کتونکی: عبدالباري حکيم