1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په کابل کي د کوچني اختر لومړۍ ورځ

په پلازمېنه کابل کې د اختر لومړۍ ورځ په شور او زوږ سره ولمانځل شوه په داسي حال کې چې امنیتي ځواکونو کلک تدابیر نیولي ول، د ورځي تر پایه پوري د کومي ناوړي پیښي خبر نه وو تر لاسه شوی.

یو شمیر کابل ښاریانو له دویچه ویله پښتو انټرنټپاڼي سره په خبرو کې وویل چې سږنی اختر یي د تیر هغه په پرتله ستر توپير لري.

هغوی ویل چې سږنی کوچنی اختر په ډیر جوش او خروش سره پیل شوی دئ او ډیري خلک په ډاډه زړه د ښار یوې او بلي سیمي ته د سنتي دودونو د تر سره کولو له پاره ځي.

د کابل د شش درک سیمي یوه اوسیدونکي مرجان وویل: کوچنی اختر مو په ډیره ډاډه فضا کې پیل کړ، په خوښیو سره هري خوا ته تلای شو او د کومې ویري او ډار احساس نه کوو.

مرجان وایي دی د ښار په هره څنډه کې د امنیتي ځواکونو په لیدو سره په دې ډاډه کیږي چې له ویري پرته کولای شي خپل مراسم پر ځای کړي چې همداسي هم وشول.

همدا راز د احمد شاه بابا میني یوې اوسیدونکي شملې دویچه ویله پښتو انټرنټپاڼي ته وویل چې د تیر کال په پرتله دوي سږ کال د هوساتیا او ډیري آزادۍ احساس کوي.

هغه وایي اوس نجوني او ښځي کولای شي هرې خوا ته له نارینه پرته تګ را تګ وکړي او دا ډیر خوشاله ده چې دا ورځ په پوره ډاډمنه فضا کې سر  ته ورسیده او له خپلو خپلوانو سره ئې وکتل.

که څه هم افغانستان په تیرو اونیو کې د خونړیو بریدونو شاهد وو بیا هم ډیری خلکو د اختر په ورځ په خپلو ناستو او مېلمستیاوو کې د ملک د امن او پخلایني له پاره دعاګاني وکړي.

د کابل د نوې کارتې په سیمه کې په یوه سینما کي د ماښام له پاره د کنسرت تابیا نیول شوي وه.

دغي سینما ته ورغلو او د کنسرت تنظیمونکو د وینا له  مخي چي دوی له بهراو دننه څخه یو شمیر ښځینه او نارینه سندرغاړي دغه سندریز اختریز ماښام له پاره را بللي دي.

د مدیر جمال په نامه د کنسرټ یوه ناظم دویچه ویله پښتو انټرنيتپاني ته وویل چي دوی د اختر دریو ورځو ته د کنسرتونو له پاره تابیا نیولې ده او د کنسرت د ګډون ټکټونه لا یوه ورځ وختي پای ته رسیدلي دي.

هغه وویل چي د هري شپې له پاره یي شاوخوا اوه سوه ټکټونه خرڅ کړي دي په داسي حال کې چې تیر کال د هري شپې له پاره تر څلور سوه ډیر ټکټونه نه ول خرڅ شوي.

په همدې حال کې د کابل په حضوري چمن کې د اختر د دوهمي ورځي له پاره یو شمیر دودیزو جشنونو ته هم تابیا نیول شوې ده.

ميرويس جلالزی/ کابل
کتونکی: نجيب الله زيارمل