1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په پاريس کي ځانمرگی کمربند موندل سوی

په پاريس کي تر تروريستي يرغلونو لس ورځي وروسته د چاودېدونکو موادو ډک کمربند موندل سوی دئ. د پاريس څارنوال ويلي دي چي کمربند د ښاروالۍ کارگرانو د ښار د پاکۍ پرمهال د کثافاتو په يوه صندق کي موندلی.

د پاريس څارنوال د دوشنبې په ماښام له چاودېدونکو موادو ډک کمربند موندل تائيد کړل. د پوليسو د معلوماتو له مخي دغه کمربند د دوشنبې په ورځ (۲۰۱۵م کال د نوامبر ۲۳مه) تر غرمې وروسته د پاريس په جنوب کي د کثافاتو په يوه ټېله کي موندل سوی دئ.

ويل کيږي چي کمربند پټاکۍ نه لره. خو کمربند داسي جوړ سوی يا سره تړل سوی وو، لکه په پاريس کي د ۷ تنو بريدکوونکي چي د نوامبر مياشتي پر ۱۳ نېټه ئې ځانونه والوزول.

ويل کيږي چي د کمربند د موندلو سيمي ته نژدې وروستۍ وار د صلاح عبدالسلام د تليفون زگنال ښوول سوی وو. عبدالسلام د پاريس د بريدونو يو له طراحانو څخه شمېر کيږي او د هغه يو ورور هم په پاريس کي ځانمرگی بريد کړی.

د کارپوهانو په اند دغه کمبربند عبدالسلام غورځولی، ځکه هغه له کاره وتلی وو. عبدالسلام تر اوسه په تښته بريالی دئ او په ټوله نړۍ کي ئې د موندلو پلټني رواني دي.

په پاريس کي ترهگرو يرغلونو ۱۳۰ انسانان ووژل او تر ۳۵۰ پوري نور پکښې ټپيان سول.

DW.COM