1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په نورستان کې ۱۵ ماشومان شري وژلي دي

په نورستان ولایت کې د شري ناروغۍ په تیرو درو اوونیو کې ۱۵ ماشومان وژلي دي. دغه خبر د نورستان والي حافظ عبدالقیوم، د یکشنبې په ورځ ورکړی دی.

هغه ویلي دي: «ډیر شمیر ماشومان د دې ناروغۍ تر اغیزې لاندې راغلي دي.» والي زیاته کړې ده چې اوس دغه ناروغۍ یوازې په یوې ولسوالۍ پورې محدوده ده.

قیوم زیاته کړې ده چې که څه هم سیمې ته روغتیایي سیار ټيمونه استول شوي او زیانمنو ماشومانو ته مرستې رسوي، خو د دې له کبله چې یو شمیر سیمې د طالبانو تر کنترول لاندې دې، ټولو ته مرسته نه شي رسول کیدای. والي ویلي دي چې طالبان اجازه نه ورکوي چې له ماشومانو سره مرسته وشي.

دغه افغان چارواکي روښانه کړې ده چې اوس ځایي حکومت د سیمه ایزو مشرانو په مرسته له طالبانو سره په اړیکه کې دي چې هغوی دې ته وهڅوي چې اجازه ورکړي له ماشومانو سره روغتیایي مرسته وشي.

طالبانو لا تر اوسه پورې د دې موضوع په اړه څه نه دي ویلي.