1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په مزارشریف کې د آلمان پر قونسلګرۍ د موټر بم برید

په مزا رشریف ښار کې یوې پیاوړې چاودنه لږ تر لږه دوه کسان وژلي او تر سلو پورې نور کسان یې ټپیان کړي دي. چاودنه هغه وخت رامنځ ته شوه یاغیانو یو موټر بم په دې ښار کې د آلمان د قنسلګرۍ له دیوال سره وجنګوه.

ځايي اوسیدونکي وایي چې چاودنه ډیره پیاوړې وه او له کبله يې د شاوخوا ډیرو ودانیو ښيښې ماتې شوې دي.

د بلخ ولایت د ملکي روغتون مشر ډاکټر نور محمد فیض، خبري آژانسونو ته ویلي دي: «ډیر کسان د ماتو شویو ښیښو په ټټو ټپي شوي دي.»

طالبانو د برید پړه پر غاړه اخیستې ده او ویلي یې دي چې هغه یې په کندز ولایت کې د وروستي برید پر وړاندې د غچ اخیستلو په موخه ترسره کړی دی.

د چارواکو په خبره د ټپي شویو کسانو شمیر ۱۰۰ تنو ته رسیږٍي چې ډیری یې د ماتو شویو ښیښو له کبله زوبل شوي دي. په داسې حال کې چې طالبانو په برید کې د ډیر شمیر کسانو د وزل کیدو خبره کړې، د بلخ والي عطا محمد نور، په یوه بیانیه کې ویلي دي چې یوازې ده کسان وژل شوي.

د بلخ ولایت ویاند منیر فرهاد، ویلي دي چې یاغیانو په دې ولایت کې د آلمان د قنسلګرۍ له دیوال سره له چاودیدونکو موادو ډک موټر جنګولی دی. لا تر اوسه پورې روښانه نه ده چې پیښې د قنسلګرۍ آلماني کارکوونکو ته زیان رسولی او که نه. د بلخ ولایت د پولیسو قوماندان ویلي دي چې اوس آلماني ځواکونه په سیمه کې دي.