1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په ليبيا کي ياغيان د پرمختګ په حال کي دی

د لويديځو متحدينو د هوايي ببماريو په مرسته د ليبيا د رژيم مخالفين وتوانيدل چي پرون له ستراتيژيکي لحاظه مهم ښار اجدبيه د معمرالقذافي له ځواکونو بيرته ونيسي.

«د هوايي بمباريو ترڅنګ دي متحدين پر نورو لارو چارو هم فکر وکړي»

«د هوايي بمباريو ترڅنګ دي متحدين پر نورو لارو چارو هم فکر وکړي»

د ليبيا د بهرنيو چارو د وزير مرستيال خالد قيم ومنله چي دغه ښار د حکومت له کنترول څخه وتلی دی، خو وويل چي هلته به حکومت عسکر بيرته په حملو لاس پوري کړي.

د لويديځو متحدينو جټ الوتکو د اجدبيه په ښار کي د قذافي د رژيم پر ټانکونو او زره لرونکو نقليه وسايلو د جمعې په ماخستن حملې وکړې او د ياغيانو لپاره لاره اواره کړه چي بيرته ښار ته ننوزي او هغه تر خپل کنترول لاندي راولي.

د ياغيانو يو تن وويل:« نن مو اجدبيه ونيوله، سباته انشاء االه بريغا، راسلانوف، زيرته، طرابلس او ميسارتا نيسو، له دي سره قذافي بايد له قدرت څخه ليري کړای سي.»

په داسي حال کي چي د ليبيا په دننه کي د رژيم پر ځواکونو د لويديځو متحدينو هوايي بمباري دوام لري، نړيواله ټولنه هڅه کوي چي قذافي باندي فشار زيات کړي ترڅو له قدرت څخه لاس واخلي. په دې اړه د جمعې په ورځ د ملګرو ملتوعمومي منشي بان کي مون په څرکنده توګه وويل:

«قذافي هر ډول مشروعيت له لاسه ورکړی، ځکه هغه غواړي چي خپل خلک ووژني. دا چي هغه خپله بايد له قدرت څخه لاس واخلي او يا بل څوک د هغه پر ځای وټاکل سي، دا د ليبيا د ولس خپل تصميم دی چي بايد ونيسي.»

د فرانسې ولسمشر نيکولای سرکوزي ويلي دي چي د هوايي بمباريو ترڅنګ دي متحدين پر نورو لارو چارو هم فکر وکړي ترڅو په ليبيا کي د ولسي وګړو د ساتني لپاره د ملګرو ملتو پريکړه تطبيق سي او دغه روان کړکيچ ژر تر ژر پای ته ورسيږي.

د متحده ايالاتو پخواني ولسمشر بيل کلينتن په نايجريا کي د يوې جايزي د ورکړي د مراسمو په وخت کي پر قذافي غږ وکړ چي هيواد خوشي کړي.

هغه وويل: « ښه به دا وي چي دی ووزي، هغه ډيري پيسي لري او کولای سي چي په بهر کي ژوند وکړي او د ليبيا خلکو ته خپل هيواد او د هغه د تيلو شتمني پريږدي.»

په داسي حال کي چي د لويديځو متحدينو هوايي بمباري دوام لري او ناټو هم د ليبيا پرهوايي قلمرو باندي د څارني ماموريت په غاړه اخيستی د امنيت د شورا بل دايمي غړی هيواد، روسيي، لويديځ ته په ليبيا کي د « اوږدي جګړې» د ښکيل کيدو خبرداری ورکړی دی.

په ناټو کي د روسيې سفير ديمتري راګوزين د روسيې خبري آژانس، انترفکس ته پرون وويل:« څرنګه چي موږ وړاندوينه کړې وه، ناټو وار په وار د افريقا په شمال کي په يوه جګړه کي ښکيليږي.» هغه زياته کړه: « امريکا متحده ايالات او د هغي نور نژدې متحدين د افغانستان او عراق د جګړې ترڅنګ يو بلي جګړي ته مخ اړولی دی.»

روسيي د آلمان په څير د امنيت په شورا کي د ليبيا پر هوايي قلمرو باندي د بنديز لګولو پريکړي ته له راييو ورکولو څخه ډه ډه وکړه. د هغې شورا د يوې دايمي غړي په توګه روسيې کولای سوای چي دغه پريکړه يي ويتو کړې وای.

خو مسکو د ليبيا پر ضد د اقتصادي بنديزونو څخه ملاتړ کوي او دليل راوړي چي په ليبيا کي د ولسي وګړو د وژلو کيدو له امله انديښنه لري.

تورستين/ عبدالباري حکيم

کتونکی: نجيب الله زيارمل