په فراه کي ولسي وګړي له محلي پولیسو څخه خوښ دي | افغانستان | DW | 09.01.2012
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په فراه کي ولسي وګړي له محلي پولیسو څخه خوښ دي

که څه هم د افغانستان په ځینو برخو کي د محلي پولیسو له جوړیدو سره مخالفت ډير دئ، خو د فراه ولایت د پشت رود ولسوالۍ اوسیدونکي بیا له دغو ځواکونو څخه خوښي څرګندوي او وايي چي له جوړیدو سره ئې په سیمه کي امنیت ټینګ شوی دئ.

په ځینو مواردو کې د محلي پولیسو څخه شکایتونه هم شته

په ځینو مواردو کې د محلي پولیسو څخه شکایتونه هم شته

د فراه ولایت د پشت رود ولسوالۍ د مسو کلی چي په تیرو کلونو کي ئې اوسیدونکو له ناامنۍ او غلاوو څخه سرټکاوه، اوس د محلي پولیس په رامنځته کيدلو سره د کلي اوسیدونکي له ښې امنیتي وضعې څخه خوشاله دي.

دغه کلی د فراه د مرکز په ۲۵ کیلومترۍ کي په پشت رود ولسوالۍ کي پروت دئ. د کلي د اوسیدونکو په وینا اوس چي په دغه سیمه کي د محلي پولیسو له جوړیدو سره امنیت راغلی دئ، ورسره یوځای د بیارغاوني کارونه هم پیل شوي دي.

د مسو د کلي اوسیدونکي د محلي پولیسو له چلند څخه راضي دي. د سیمې یو قومي مشر، عبدالحمید، وایي چي مرکزي حکومت د محلي پولیسو په مرسته له سیمې څخه یاغیان شړلي دي او په سیمه کي ئې امنيت ټينګ کړی دئ. په مسو کي د محلي پولیسو مشر جلات خان وایي چي د خلکو او دولت تر منځ اوږد مهاله همکارۍ په سیمه کي د امنیت د ټینګښت لامل شوی دئ.

محلي پولیس له تیرو درو کلونو را هيسي په افغانستان کي د نړیوالي ټولني په مالي ملاتړ د سيمي له خلکو څخه جوړيږي. د دغو ځواکونو د جوړیدو په اړه نظرونه مختلف دي. ځیني افغانان دغه ځواکونه د حکومت تر څنګ یو موازي ځواک ګڼي او د لا ډیري ناامنۍ د رامنځته کېدلو لامل ئې بولي، خو یو شمیر نور افغانان بیا د دغو ځواکونو جوړیدل د امنیت د رامنځته کولو او د افغان امنیتي ځواکونو د شمیر د لوړولو تر ټولو ښه او ګړندۍ لاره بولي.

خو پر دې ټولو سربیره په ځینو مواردو کي پر محلي پولیسو هم ډیر جدي تورونه لګول شوي دي. د بېلګي په توګه تېر کال د بادغیس په مقر ولسوالۍ کي پر محلي پولیسو د ښځو او ماشومانو په شمول د څه د پاسه سلو تنو ولسي وګړو د وژلو او یا ټپي کولو تور لګول شوی وو. هغه وخت افغان دولتي چارواکو هم د پيښي تائيد کړی وو.

دویچه ویله/ شریف شرفیار
کتونکی: مسعود جهش

DW.COM